ഓട്ടവ : ഫെഡറൽ തെരഞ്ഞെടുപ്പിന് രണ്ടാഴ്ച മാത്രം ശേഷിക്കെ ഈ വാരാന്ത്യത്തിൽ അഡ്വാൻസ് വോട്ടിങ് ആരംഭിക്കും. വെള്ളിയാഴ്ച മുതൽ തിങ്കൾ വരെ വോട്ടർമാർക്ക് അവരുടെ നിയുക്ത പോളിങ് സ്റ്റേഷനുകളിൽ മുൻ‌കൂർ വോട്ട് രേഖപ്പെടുത്താം. വോട്ടർമാർക്ക് മെയിൽ വഴിയും വോട്ട് രേഖപ്പെടുത്താമെന്ന് ഇലക്ഷൻസ് കാനഡ അറിയിച്ചു. എന്നാൽ ഏപ്രിൽ 22-ന് വൈകിട്ട് ആറു മണിക്ക് മുമ്പ് അതിന് അപേക്ഷിക്കണം. ഇങ്ങനെ അപേക്ഷിക്കുന്ന വോട്ടർമാർക്ക് ഒരു പ്രത്യേക പാക്കേജ് അവരുടെ വിലാസത്തിലേക്ക് അയയ്ക്കും. പാക്കേജിനുള്ളിലെ ഫോമുകൾ പൂരിപ്പിച്ച് വോട്ടർമാർക്ക് മെയിൽ വഴി തിരികെ നൽകാം. എന്നാൽ, ഏപ്രിൽ 28-ന് വൈകിട്ട് ആറു മണിക്കുള്ളിൽ ഫോമുകൾ ഇലക്ഷൻസ് കാനഡയ്ക്ക് ലഭിക്കണം.
രജിസ്റ്റർ ചെയ്ത വോട്ടർമാർക്ക് രാജ്യത്തുടനീളമുള്ള 500 ഇലക്ഷൻസ് കാനഡ ഓഫീസുകളിൽ ഏതിലെങ്കിലും ഒന്നിൽ പോയി ഏപ്രിൽ 22-ന് വൈകിട്ട് ആറു മണിക്ക് മുമ്പ് എപ്പോൾ വേണമെങ്കിലും പ്രത്യേക ബാലറ്റ് രേഖപ്പെടുത്താം. വോട്ടുചെയ്യാൻ പ്രത്യേക സഹായം ആവശ്യമുള്ള ആർക്കും അവരുടെ പ്രാദേശിക തിരഞ്ഞെടുപ്പ് ഓഫീസിൽ നിന്ന് സഹായം ലഭിക്കും. ലോങ് ടേം കെയർ ഹോമുകളിലെ താമസക്കാർക്ക് ഈ സേവനം പ്രയോജനപ്പെടുത്താം. കൂടാതെ ഏപ്രിൽ 16 വരെ രാജ്യത്തുടനീളമുള്ള സർവകലാശാലകളിലും കോളേജുകളിലും 109 ‘വോട്ട് ഓൺ കാമ്പസ്’ ഓഫീസുകൾ തുറന്നിട്ടുണ്ടെന്ന് ഇലക്ഷൻസ് കാനഡ മീഡിയ റിലേഷൻസ് നതാലി ഡി മോണ്ടിഗ്നി അറിയിച്ചു. വിദേശത്ത് താമസിക്കുന്ന കനേഡിയൻ പൗരന്മാർ, അവർ കുറഞ്ഞത് 18 വയസ്സ് പ്രായമുള്ളവരും മുമ്പ് രാജ്യത്ത് താമസിച്ചവരുമാണെങ്കിൽ വോട്ടുചെയ്യാൻ അർഹതയുണ്ട്. ഇവർക്ക് വോട്ടിങ് കിറ്റ് ലഭിക്കുന്നതിന് ഇൻ്റർനാഷണൽ രജിസ്റ്റർ ഓഫ് ഇലക്‌ടേഴ്‌സിൽ രജിസ്റ്റർ ചെയ്യണം.
