ഓട്ടവ: കാനഡയിൽ ‘ടാക്സ് ഫ്രീഡം ഡേ’ ഇന്ന്. കാനഡയിൽ ഓരോ വർഷവും നികുതിദായകർ അവരുടെ വാർഷിക നികുതി ബാധ്യത അടച്ചുതീർത്ത് സ്വന്തം വരുമാനത്തിനായി ജോലി ചെയ്യാൻ തുടങ്ങുന്ന പ്രതീകാത്മക ദിനമായാണ് ജൂൺ 9നെ കണക്കാക്കുന്നതെന്ന് ഫ്രേസർ ഇൻസ്റ്റിറ്റ്യൂട്ട്. രാജ്യത്തെ നികുതി ഘടനയും വരുമാനത്തിലെ വലിയൊരു പങ്ക് നികുതിയായി പോകുന്നതുമാണ് ഈ ദിനത്തെ വീണ്ടും ശ്രദ്ധാകേന്ദ്രമാക്കുന്നത്.
ഇൻസ്റ്റിറ്റ്യൂട്ടിന്റെ കണക്കുകൾ പ്രകാരം 2026-ൽ ശരാശരി കനേഡിയൻ കുടുംബത്തിന്റെ വാർഷിക വരുമാനം ഏകദേശം 166,790ഡോളറാണ് . ഇതിൽ ഏകദേശം 72,539 ഡോളറോളം (43.5%) ഫെഡറൽ, പ്രൊവിൻഷ്യൽ, മുനിസിപ്പൽ നികുതികളായി നൽകേണ്ടിവരുമെന്നാണ് റിപ്പോർട്ട് വ്യക്തമാക്കുന്നത്. ഈ കണക്കുകൾ അടിസ്ഥാനമാക്കിയാണ് വർഷത്തിലെ ഒരു പ്രത്യേക ദിവസം “ടാക്സ് ഫ്രീഡം ഡേ” ആയി നിർണ്ണയിക്കുന്നത്.
ടാക്സ് ഫ്രീഡം ഡേ ഒരു ഔദ്യോഗിക സർക്കാർ അവധിദിനമല്ല. ഒരു വർഷത്തിൽ ജനങ്ങൾ എത്ര ദിവസം ജോലി ചെയ്ത് നികുതികൾ അടയ്ക്കുന്നുവെന്ന് കണക്കാക്കി, അതിന് ശേഷം വരുന്ന ദിവസങ്ങളിൽ ലഭിക്കുന്ന വരുമാനം “സ്വന്തം വരുമാനം” ആയി കാണുന്ന ഒരു പ്രതീകാത്മക ആശയമാണ് ഇത്. സാമ്പത്തിക നയങ്ങളും നികുതി സംവിധാനവും ജനങ്ങൾക്ക് കൂടുതൽ വ്യക്തമായി മനസ്സിലാക്കാൻ സഹായിക്കുകയാണ് ഈ കണക്കിന്റെ ലക്ഷ്യം.
നികുതി വിദഗ്ധൻ ഡേവിഡ് റോട്ട്ഫ്ലീഷ് വ്യക്തമാക്കുന്നത് പ്രകാരം, ഈ കണക്കിൽ ഫെഡറൽ, പ്രൊവിൻഷ്യൽ, മുനിസിപ്പൽ നികുതികൾ മാത്രമാണ് ഉൾപ്പെടുത്തിയിരിക്കുന്നത്. എന്നാൽ HST/GST, പ്രോപ്പർട്ടി ടാക്സ്, പാസ്പോർട്ട് ഫീസ് പോലുള്ള മറ്റ് സർക്കാർ ഫീസുകൾ ഇതിൽ ഉൾപ്പെടുത്തിയിട്ടില്ല.അദ്ദേഹം ചൂണ്ടിക്കാട്ടുന്നത്, സർക്കാർ സേവനങ്ങൾ — സൈന്യം, പോലീസ്, റോഡുകൾ, വിമാനത്താവളങ്ങൾ, എയർ ട്രാഫിക് കൺട്രോൾ തുടങ്ങിയവ — പ്രധാനമായും ഈ നികുതി വരുമാനത്തിലൂടെയാണ് പ്രവർത്തിക്കുന്നതെന്നാണ്.
ടാക്സ് ഫ്രീഡം ഡേ പ്രസിദ്ധീകരിക്കപ്പെടുമ്പോൾ തന്നെ കാനഡയിലെ നികുതി ഭാരം, സർക്കാർ ചെലവുകൾ, സേവനങ്ങളുടെ മൂല്യം എന്നിവയെക്കുറിച്ച് പൊതുചർച്ചകൾ ഉയരാറുണ്ട്. ചിലർ ഉയർന്ന നികുതി ഭാരം ചൂണ്ടിക്കാട്ടുമ്പോൾ, മറ്റുചിലർ പൊതു സേവനങ്ങളുടെ ഗുണനിലവാരം പരിഗണിക്കേണ്ടതുണ്ടെന്ന് അഭിപ്രായപ്പെടുന്നു.
കാനഡയിലെ പ്രവിശ്യകൾക്കനുസരിച്ച് ഈ തീയതിയിൽ മാറ്റങ്ങൾ വരാറുണ്ട്. സസ്കാച്വാനിൽ (Saskatchewan) ഏറ്റവും നേരത്തെ മെയ് 20-നും,കെബെക്കിൽ(Quebec) ഏറ്റവും വൈകി ജൂൺ 27-നുമാണ് ടാക്സ് ഫ്രീഡം ഡേ വരുന്നത്
