ചെന്നൈ: സ്ത്രീകളുടെ സുരക്ഷ ഉറപ്പാക്കുന്നതിനായി തമിഴ്നാട് മുഖ്യമന്ത്രി സി. ജോസഫ് വിജയ് ആവിഷ്കരിക്കുന്ന ‘സിങ്കപ്പെണ്’ പദ്ധതിക്ക് ഇന്ന് ഔദ്യോഗികമായി തുടക്കമാകും. സ്ത്രീകളുടെ സുരക്ഷ ഉറപ്പാക്കുന്നതിനും അടിയന്തര സാഹചര്യങ്ങളില് ദ്രുതഗതിയില് പ്രതികരിക്കുന്നതിനുമായി രൂപീകരിച്ച, സ്ത്രീകള് മാത്രമുള്ള പ്രത്യേക പോലീസ് വിഭാഗമാണ് ‘സിങ്കപ്പെണ് സ്പെഷ്യല് ടാസ്ക് ഫോഴ്സ്’. തമിഴ്നാട്ടിലുടനീളമുള്ള സ്ത്രീകളുടെയും കുട്ടികളുടെയും സുരക്ഷ കാര്യക്ഷമമായി വര്ദ്ധിപ്പിക്കുക എന്നതാണ് ഈ പദ്ധതിയുടെ പ്രധാന ലക്ഷ്യം. സി. ജോസഫ് വിജയ് മുഖ്യമന്ത്രിയായി ചുമതലയേറ്റയുടന് ഒപ്പുവെച്ച ആദ്യത്തെ നിര്ണായക ഉത്തരവുകളില് ഒന്നായിരുന്നു ഈ പ്രത്യേക സേനയുടെ രൂപീകരണം.
ഇന്സ്പെക്ടര് ജനറല് ഓഫ് പോലീസ് (ഐജി) കെ. ഭവാനിശ്വരിയാണ് ഈ സിങ്കപ്പെണ് സ്പെഷ്യല് ഫോഴ്സിന് നേതൃത്വം നല്കുന്നത്. അത്യാധുനിക സംവിധാനങ്ങളോടെയും പ്രത്യേക പരിശീലനത്തോടെയുമാണ് ഈ വനിതാ പോലീസ് സേന രംഗത്തിറങ്ങുന്നത്. പദ്ധതിയുടെ സുഗമമായ നടത്തിപ്പിനായി വിവിധ വിന്യാസങ്ങളും ക്രമീകരണങ്ങളും ആഭ്യന്തര വകുപ്പ് ഇതിനോടകം തന്നെ പൂര്ത്തിയാക്കിയിട്ടുണ്ട്.
ഡിജിപി ഓഫീസ് പുറപ്പെടുവിച്ച ഉത്തരവ് പ്രകാരം, സൈബര് ക്രൈം വിഭാഗത്തില് നിന്നുള്ള രണ്ടുപേര് ഉള്പ്പെടെ 18 സബ് ഇന്സ്പെക്ടര്മാരെ ‘ഓണ് ഡ്യൂട്ടി’ വ്യവസ്ഥയില് ഈ സേനയിലേക്ക് ആദ്യഘട്ടത്തില് നിയോഗിച്ചിരുന്നു. സിങ്കപ്പെണ് സ്പെഷ്യല് ഫോഴ്സ് ഐജിയുടെ കത്തിന്റെ അടിസ്ഥാനത്തില് പുറപ്പെടുവിച്ച പുതിയ ഉത്തരവ് പ്രകാരം, ബന്ധപ്പെട്ട ഉദ്യോഗസ്ഥരെ ഉടന് തന്നെ നിലവിലുള്ള ചുമതലകളില് നിന്ന് വിടുതല് ചെയ്ത് പുതിയ സേനയില് റിപ്പോര്ട്ട് ചെയ്യാന് കര്ശന നിര്ദ്ദേശം നല്കിയിട്ടുണ്ട്.
ഇവര്ക്കു പുറമേ ഡിജിപി ഓഫീസിലെ സോഷ്യല് മീഡിയ സെല്ലില് നിന്നുള്ള ജീവനക്കാര്, വടപളനി പോലീസ് സ്റ്റേഷനിലെ ഒരു ഹെഡ് കോണ്സ്റ്റബിള്, ഗ്രേറ്റര് ചെന്നൈ പോലീസിന്റെ ഇന്റലിജന്സ് വിംഗില് നിന്നുള്ള ഒരു ഗ്രേഡ്-1 പോലീസ് കോണ്സ്റ്റബിള് (ഇരുവരും സോഷ്യല് മീഡിയ സെല്ലില് ഓണ് ഡ്യൂട്ടിയിലായിരുന്നു) എന്നിവരെയും ഈ വിഭാഗത്തിലേക്ക് മാറ്റിയിട്ടുണ്ട്. കൂടാതെ അവടി, വീരപുരം, കോവൈപുതൂര്, ഉളുന്തൂര്പേട്ട, സേവൂര് എന്നീ പ്രദേശങ്ങളിലെ തമിഴ്നാട് സ്പെഷ്യല് പോലീസ് ബറ്റാലിയനുകളില് നിന്നുള്ള വനിതാ പോലീസ് ഉദ്യോഗസ്ഥരും ഈ അത്യാധുനിക പ്രതിരോധ സേനയുടെ ഭാഗമായി മാറും.
