ഓട്ടവ : ഔദ്യോഗിക പദവി ഇല്ലാത്ത കുടിയേറ്റക്കാരെ സഹായിക്കാൻ പ്രത്യേക ഇമിഗ്രേഷൻ പാത്ത് വേ ആവശ്യമെന്ന് പ്രധാനമന്ത്രി ജസ്റ്റിൻ ട്രൂഡോ. താൽക്കാലിക വീസയിൽ കാനഡയിൽ താമസിക്കുന്നവരും അഭയാർത്ഥി അപേക്ഷകൾ നിരസിച്ചതിനെ തുടർന്ന് കാനഡയിൽ തുടരുന്നവരോ അനധികൃതമായി കാനഡയിൽ എത്തിയവരോ ആണ് ഔദ്യോഗിക രേഖകളില്ലാത്ത കുടിയേറ്റക്കാർ.
ഔദ്യോഗിക രേഖകളില്ലാത്ത കുടിയേറ്റക്കാർക്ക് പൗരത്വം ഉറപ്പുവരുത്താൻ ഇമിഗ്രേഷൻ മിനിസ്റ്റർ മാർക്ക് മില്ലർ പ്രവർത്തിക്കുന്നുണ്ടെന്നും ട്രൂഡോ അറിയിച്ചു. പാർലമെൻ്റിൻ്റെ വേനൽക്കാല അവധിക്ക് മുമ്പ് പുതിയ നിയമം അവതരിപ്പിക്കുമെന്ന് പ്രതീക്ഷിക്കുന്നതായി അദ്ദേഹം പറഞ്ഞു.
രേഖകളില്ലാത്ത കുടിയേറ്റക്കാർ പിടിക്കപ്പെടുമെന്ന ഭയത്തിലാണ് ജീവിക്കുന്നത്. കൂടാതെ ശരിയായ ചികിത്സയും ഭക്ഷണവും ലഭിക്കാതെ ഇവരിൽ പലരുടെയും ആരോഗ്യസ്ഥിതി വളരെ മോശം അവസ്ഥയിലാണെന്നും ജസ്റ്റിൻ ട്രൂഡോ പറയുന്നു. ഇത്തരം കുടിയേറ്റ ജനതയ്ക്ക് പിന്തുണയും പരിചരണവും ആവശ്യമാണ്, ട്രൂഡോ പറഞ്ഞു. റെഗുലറൈസേഷൻ പ്രോഗ്രാമിൻ്റെ അഭാവം ചൂഷണത്തിന് വിധേയരായ ആളുകളെ കാനഡയിൽ ഔദ്യോഗിക പദവിയില്ലാത്തവരാക്കുന്നുവെന്ന പരാതികൾ ഉയരുന്ന സാഹചര്യത്തിലാണ് പ്രധാനമന്ത്രി കാര്യങ്ങൾ വ്യക്തമാക്കിയത്.
ഔദ്യോഗിക രേഖകളില്ലാത്ത കുടിയേറ്റക്കാർ താമസിക്കുന്നുണ്ടെന്നതിന് കൃത്യമായ കണക്കില്ലെങ്കിലും രണ്ടു ലക്ഷത്തിനും അഞ്ച് ലക്ഷത്തിനും ഇടയിലായിരിക്കും ഇവരുടെ എണ്ണമെന്ന് കണക്കാക്കുന്നു.
