ഓട്ടവ : വൈദ്യുതാഘാതമേൽക്കാൻ സാധ്യത കാരണം പവർ അഡാപ്റ്ററുകൾ ഹാച്ച് തിരിച്ചുവിളിച്ചു. കാനഡയിലുടനീളം റെസ്റ്റ് 1st ജനറേഷൻ സൗണ്ട് മെഷീനുകൾക്കൊപ്പം വിറ്റഴിച്ച ഏകദേശം 44,350 പവർ അഡാപ്റ്ററുകളാണ് ഇലക്ട്രോണിക് സ്ലീപ്പ് ഉപകരണ നിർമ്മാതാക്കളായ ഹാച്ച് തിരിച്ചു വിളിച്ചത്. കാനഡയ്ക്ക് പുറമെ ഏകദേശം 919,400 പവർ അഡാപ്റ്ററുകൾ യുഎസിലും തിരിച്ചു വിളിച്ചിട്ടുണ്ട്.
എസി പവർ അഡാപ്റ്ററിന് ചുറ്റുമുള്ള പ്ലാസ്റ്റിക് ഹൗസിങ് ഇലക്ട്രിക്കൽ സോക്കറ്റിൽ നിന്ന് ഊരിയെടുക്കുമ്പോൾ അഡാപ്റ്ററിൻ്റെ പ്രോംഗുകൾ തുറക്കുകയും ഉപയോക്താക്കൾക്ക് വൈദ്യുതാഘാതം ഏൽക്കാൻ സാധ്യത ഉണ്ടെന്നും കമ്പനി പറയുന്നു. അഡാപ്റ്ററിൻ്റെ പ്ലാസ്റ്റിക് ഹൗസിങ് ഊരിപ്പോയതായി 19 കേസുകൾ റിപ്പോർട്ട് ചെയ്തിട്ടുണ്ട്. കൂടാതെ രണ്ട് ഉപയോക്താക്കൾക്ക് ചെറിയ വൈദ്യുതാഘാതം ഏറ്റതായും റിപ്പോർട്ട് ലഭിച്ചതായി കമ്പനി അറിയിച്ചു. ഈ പവർ അഡാപ്റ്ററുകൾ ഉപയോഗിക്കരുതെന്നും സൗജന്യ റീപ്ലേസ്‌മെൻ്റ് പവർ അഡാപ്റ്ററിനായി കമ്പനിയുമായി ബന്ധപ്പെടണമെന്നും ഹാച്ച് നിർദ്ദേശിച്ചു.
