ഫ്രെഡറിക്ടൺ : കഴിഞ്ഞ 50 വർഷത്തിനിടയിലെ ഏറ്റവും ഉയർന്ന ജനസംഖ്യാ വളർച്ച രേഖപ്പെടുത്തി ന്യൂബ്രൺസ് വിക്. പ്രവിശ്യയിലെ ജനസംഖ്യ 2023 ജൂലൈ 1-ന് 834,691 ആയി ഉയർന്നതായി 2023-ലെ സാമ്പത്തിക അവലോകന റിപ്പോർട്ട് സൂചിപ്പിക്കുന്നു. ഇത് 2022-ൽ നിന്ന് 3.1 ശതമാനവും 1972-ന് ശേഷമുള്ള ഏറ്റവും ഉയർന്ന വളർച്ചാ നിരക്കും ആണ്. കഴിഞ്ഞ അഞ്ച് വർഷത്തിനിടെ 64,194 പേർ പ്രവിശ്യയിൽ എത്തിയതായി റിപ്പോർട്ടിൽ പറയുന്നു. 1980-നും 2018-നും ഇടയിലുണ്ടായ ജനസംഖ്യാ വളർച്ചയ്ക്ക് തുല്യമാണിത്. കാനഡയിൽ തുടർച്ചയായി രണ്ടാം വർഷവും അതിവേഗം ജനസംഖ്യാ വളർച്ച കൈവരിച്ച മെട്രോപൊളിറ്റൻ നഗരങ്ങളിൽ പ്രവിശ്യയിലെ മോൺക്ടൺ, ഫ്രെഡറിക്ടൺ എന്നീ നഗരങ്ങളും ഉൾപ്പെടുന്നു.
![cansmiledental](http://mcnews.ca/wp-content/uploads/2023/10/cansmiledental-1024x676.jpg)
പ്രവിശ്യയുടെ സമ്പദ്വ്യവസ്ഥ 2023-ൽ 1.3 ശതമാനവും തൊഴിൽ മേഖല 3.5 ശതമാനവും വളർച്ച കൈവരിച്ചതായി റിപ്പോർട്ട് പറയുന്നു. ഇത് 2002 ന് ശേഷമുള്ള ഏറ്റവും ഉയർന്ന വളർച്ചാ നിരക്കാണ്. അതേസമയം തൊഴിലില്ലായ്മ നിരക്ക് 6.6 ശതമാനമായി കുറഞ്ഞു, 1976-ന് സ്റ്റാറ്റിസ്റ്റിക്സ് കാനഡ ഡാറ്റ ശേഖരിക്കാൻ തുടങ്ങിയതിനുശേഷം ന്യൂബ്രൺസ് വിക്കിൽ രേഖപ്പെടുത്തിയിട്ടുള്ള ഏറ്റവും കുറഞ്ഞ നിരക്കാണിത്,” റിപ്പോർട്ട് പറയുന്നു. ഇതോടൊപ്പം പ്രവിശ്യയിലെ സ്വകാര്യ അപ്പാർട്ടുമെൻ്റുകളുടെ മൊത്തത്തിലുള്ള ഒഴിവുകളുടെ നിരക്ക് 2022-ലെ 1.9 ശതമാനത്തിൽ നിന്ന് 2023-ൽ 1.5 ശതമാനമായി കുറഞ്ഞു. കൂടാതെ കെട്ടിട നിർമ്മാണത്തിലെ നിക്ഷേപം 38 ലക്ഷം ഡോളറിലെത്തി.