യുഎസ് പ്രസിഡന്റ് തെരഞ്ഞെടുപ്പിന്റെ ഭാഗമായി ഡെമോക്രാറ്റിക് സ്ഥാനാർത്ഥി കമല ഹാരിസും റിപ്പബ്ലിക്കൻ സ്ഥാനാർത്ഥി ഡോണൾഡ് ട്രംപും നേരിട്ട് ഏറ്റുമുട്ടിയ ആദ്യ സംവാദം അവസാനിച്ചു. ഗാസ യുദ്ധം, സാമ്പത്തിക രംഗം, ഗർഭച്ഛിദ്രം, കുടിയേറ്റം അടക്കമുള്ളവ സംവാദത്തിലെ പ്രധാന വിഷയങ്ങളായതായി അമേരിക്കൻ മാധ്യമങ്ങൾ റിപ്പോർട്ട് ചെയ്തു. പെന്സിൽവേനിയയിലെ ഫിലഡൽഫിയയിലുള്ള എൻ സി സി സെന്ററിൽ അമേരിക്കൻ സമയം ചൊവ്വാഴ്ച രാത്രിയായിരുന്നു സംവാദം.
ആദ്യസംവാദം കഴിയുമ്പോൾ എല്ലാ വിഷയങ്ങളിലും കൃത്യമായ നിലപാട് സ്വീകരിക്കാൻ കമല ഹാരിസിന് കഴിഞ്ഞപ്പോൾ പലപ്പോഴും ട്രംപിന് പതറേണ്ടി വന്നു. സാമ്പത്തികരംഗം ഗർഭച്ഛിദ്രവും എന്നിവ ഉയർത്തി ട്രംപിനെ പ്രതിരോധത്തിലാക്കുന്ന തന്ത്രമാണ് കമലാ ഹാരിസ് സ്വീകരിച്ചത്. ഗർഭച്ഛിദ്രം വിഷയത്തിൽ സ്ത്രീകളുടെ അവകാശം ഹനിക്കുന്ന നിലപാടാണ് ട്രംപ് സ്വീകരിക്കുന്നതെന്ന് കമല ഹാരിസ് പറഞ്ഞു. ട്രംപ് അധികാരത്തിലെത്തിയാൽ രാജ്യത്തൊട്ടാകെ ഗർഭച്ഛിദ്രം നിരോധിക്കുന്ന നിയമം കൊണ്ടുവരുമെന്നും കമലാ ഹാരിസ് ആരോപിച്ചു.
![](http://mcnews.ca/wp-content/uploads/2023/07/Royal-LePage-JoJu-Augustine-5.jpg)
അതേസമയം അനധികൃത കുടിയേറ്റത്തിന് അനുകൂലമായ നിലപാടാണ് കമല ഹാരിസിന്റെതെന്നായിരുന്നു ട്രംപിന്റെ ആരോപണം. താൻ അധികാരത്തിലുണ്ടായിരുന്നെങ്കിൽ ഗാസ യുദ്ധം തന്നെയുണ്ടാകില്ലെന്നായിരുന്നു. ഇറാന് അനുകൂലമായി ജോ ബൈഡൻ സർക്കാർ നിന്നതുകൊണ്ടാണ് യുദ്ധമുണ്ടായതെന്നും ട്രംപ് ആരോപിച്ചു. കമല ഇസ്രായേൽ വിരുദ്ധപക്ഷത്താണെന്ന് സ്ഥാപിക്കാനും ട്രംപ് ശ്രമിച്ചു. കമല പ്രസിഡന്റായാൽ രണ്ടു വർഷത്തിനകം ഇസ്രായേൽ ഇല്ലാതാകുമെന്നും ട്രംപ് പറഞ്ഞു.