എഡ്മിന്‍റൻ : പ്രവിശ്യയിലെ പ്രാഥമിക പരിചരണം ശക്തിപ്പെടുത്തുന്നതിനായി പുതിയ നഴ്‌സ് പ്രാക്ടീഷണർ പ്രോഗ്രാം പ്രഖ്യാപിച്ച് ആൽബർട്ട സർക്കാർ. പുതിയ നഴ്‌സ് പ്രാക്ടീഷണർ പ്രോഗ്രാം ആയിരക്കണക്കിന് ആൽബർട്ട നിവാസികൾക്ക്‌ പ്രാഥമിക പരിചരണം ലഭ്യമാക്കും. നഴ്‌സ് പ്രാക്ടീഷണർ അസോസിയേഷൻ ഓഫ് ആൽബർട്ടയാണ് ഇക്കാര്യം പ്രഖ്യാപിച്ചത്. നഴ്‌സ് പ്രാക്‌ടീഷണർമാർക്കുള്ള പുതിയ നഷ്ടപരിഹാര മാതൃക അനുസരിച്ച് സമഗ്രമായ പരിചരണം നൽകുന്നതിനായി ഫാമിലി ഡോക്ടർമാരുടെ ശമ്പളത്തിൻ്റെ 80% അവർക്ക് നൽകും. നഷ്ടപരിഹാരത്തിന് യോഗ്യത നേടുന്നതിന്, നഴ്‌സ് പ്രാക്ടീഷണർമാർ ചുരുങ്ങിയത് 900 രോഗികൾക്കെങ്കിലും വാക്ക്-ഇൻ അപ്പോയ്ന്റ്മെന്റുകൾ ഉൾപ്പെടെ സമഗ്രമായ പ്രാഥമിക പരിചരണം നൽകിയിരിക്കണം.
പുതിയ പ്രോഗ്രാം പ്രഖ്യാപിച്ചതിന് ശേഷം 67 അപേക്ഷകൾ ലഭിച്ചതായി പ്രവിശ്യ സർക്കാർ അറിയിച്ചു. തുടർന്ന് 56 നഴ്‌സ് പ്രാക്ടീഷണർ അപേക്ഷകൾക്ക് ആൽബർട്ട സർക്കാർ അംഗീകാരം നൽകി. ഇപ്പോൾ 33 നഴ്‌സ് പ്രാക്ടീഷണർമാർ ആൽബർട്ടയിലുടനീളം സ്വതന്ത്രമായി പരിശീലനം നേടുന്നുണ്ട്. ഇത് 30,000 പേർക്ക് പ്രാഥമിക പരിചരണം ലഭ്യമാക്കുന്നു. മറ്റ് 23 അപേക്ഷകർ കൂടി പ്രാക്ടീസ് ചെയ്യാൻ തുടങ്ങിയാൽ, 21,000 ആൽബർട്ട നിവാസികൾക്ക്‌ പ്രാഥമിക പരിചരണം ലഭ്യമാകുമെന്നാണ് സർക്കാർ പറയുന്നത്. നഴ്‌സ് പ്രാക്ടീഷണർമാരുടെ അവസരങ്ങൾ വിപുലീകരിച്ച് കുടുംബ ഡോക്ടറില്ലാത്ത 700,000 താമസക്കാരെ സഹായിക്കാനാണ് സർക്കാർ ലക്ഷ്യമിടുന്നത്.
