കൊച്ചി കളമശ്ശേരി ടിവിഎസ് കവലക്ക് സമീപം മീഡിയനില്‍ ഇടിച്ച് മറിഞ്ഞ ഇന്ധന ടാങ്കര്‍ റിഫൈനറിയിലേക്ക് മാറ്റി. രാത്രി 11 മണിയോടെയാണ് അപകടം നടന്നത്. ഇരുമ്പനം ബിപിസിഎല്‍ പ്ലാന്റില്‍ നിന്നും ഗുജറാത്തിലേക്ക് പോയ ടാങ്കര്‍ ലോറിയാണ് മറിഞ്ഞത്.അപകടം മേഖലയില്‍ വലിയ രീതിയില്‍ ഗതാഗത കുരുക്കുണ്ടായി.അപകടത്തില്‍ ഡ്രൈവര്‍ക്ക് ഗുരുതര പരിക്കുകളില്ല.11:15 ന് കളമശ്ശേരി പൊലീസും ഫയര്‍ഫോഴ്‌സും സ്ഥലത്തെത്തുകയും സ്ഥിതിഗതികള്‍ വിലയിരുത്തി ബിപിസിഎല്ലുമായി ആശയവിനിമയം നടത്തുകയും ചെയ്തിരുന്നു.
പ്രാഥമിക പരിശോധനയില്‍ ടാങ്കറിന് ചോര്‍ച്ച കണ്ടെത്തിയെങ്കിലും പരിഹരിച്ചിരുന്നു.ലോറിയുടെ കാബിന്‍ പൂര്‍ണ്ണമായും നശിച്ചു.ഏറെ നേരത്തെ പരിശ്രമത്തിനൊടുവിലാണ് ലോറി ഉയര്‍ത്തിയത്. തകര്‍ന്ന കാബിന്‍ നീക്കം ചെയ്തു. തുടര്‍ന്ന് പുതിയ ക്യാബിന്‍ ഘടിപ്പിച്ചാണ് ടാങ്കര്‍ കൊച്ചി റിഫൈനറിയിലേക്ക് മാറ്റിയത്.
