റിയാദ് : 2034 ഫിഫ ലോകകപ്പ് ആതിഥേയത്വം വഹിക്കാൻ സൗദി അറേബ്യ ഒരുങ്ങുമ്പോൾ വിമാനങ്ങളുടെ എണ്ണം ഇരട്ടിയാക്കുമെന്ന് പ്രഖ്യാപനവുമായി സൗദി അറേബ്യൻ എയർലൈൻസ്. ലോകകപ്പിൽ പങ്കെടുക്കാൻ ലോകത്തിന്റെ നാനാഭാഗത്തുനിന്നെത്തുന്നവർക്ക് യാത്ര സുഗമമാക്കുന്നതിനാണ് സൗദി എയർലൈൻസ് വിമാനങ്ങളുടെ എണ്ണം കൂട്ടുന്നതെന്നും 191 വിമാനങ്ങൾ കൂടി വാങ്ങാൻ പദ്ധതിയിടുന്നതായും കമ്പനി വക്താവ് എൻജി. അബ്ദുല്ല അൽശഹ്റാനി പറഞ്ഞു. ഇതോടെ എയർലൈൻസിന്‌ ആകെ വിമാനങ്ങൾ 381 ആകും. ഓർഡർ ചെയ്തതിലെ അവസാന വിമാനം 2032 ലായിരിക്കും ലഭ്യമാകുക.
2030 റിയാദ് എക്സ്പോ, 2034 ലോകകപ്പ് എന്നിവയുടെ ആതിഥേയത്വത്തിൽ ഇലക്ട്രിക് വിമാനങ്ങൾ പ്രധാന പങ്കുവഹിക്കും. മത്സരങ്ങൾക്ക് ആതിഥേയത്വം വഹിക്കുന്ന രാജ്യത്തെ എല്ലാ നഗരങ്ങളെയും ബന്ധിപ്പിക്കുന്ന രീതിയിലാകും സർവീസുകൾ. 2030ൽ ഏകദേശം 200 പുതിയ അന്താരാ ഷ്ട്ര നഗരങ്ങളിലേക്ക് സർവീസ് വർധിപ്പിക്കാനാണ് ഗ്രൂപ്പിന്റെ പദ്ധതി. സൗദി എയർലൈൻസ് നിലവിൽ നൂറോളം ലക്ഷ്യസ്ഥാനങ്ങളിലേക്ക് സർവീസ് നടത്തുന്നുണ്ടെന്നും അദ്ദേഹം പറഞ്ഞു.
