ഓട്ടവ : പുതിയ വർഷം ആരംഭിക്കുമ്പോൾ, സാമ്പത്തിക ബാധ്യതകൾ ലഘൂകരിക്കാൻ കനേഡിയൻ പൗരന്മാർക്ക് നിരവധി ഫെഡറൽ ആനുകൂല്യങ്ങളാണ് തങ്ങളുടെ അക്കൗണ്ടിലേക്ക് എത്തുന്നത്. അതിൽ ഏറ്റവും പ്രധാനമായ അടുത്ത കാനഡ കാർബൺ റിബേറ്റ് പേയ്‌മെൻ്റ് ജനുവരി 15-ന് വിതരണം ചെയ്യുമെന്ന് കാനഡ റവന്യൂ ഏജൻസി (CRA) അറിയിച്ചു. ഈ ത്രൈമാസ പേയ്‌മെൻ്റ് ഫെഡറൽ മലിനീകരണ വിലനിർണ്ണയത്തിൻ്റെ ചെലവ് നികത്താനും പങ്കെടുക്കുന്ന എട്ട് പ്രവിശ്യകളിലുടനീളമുള്ള കുടുംബങ്ങൾക്ക് ആവശ്യമായ ആശ്വാസം നൽകാനും ലക്ഷ്യമിടുന്നു.
മുമ്പ് ക്ലൈമറ്റ് ആക്ഷൻ ഇൻസെൻ്റീവ് പേയ്‌മെൻ്റ് (CAIP) എന്നറിയപ്പെട്ടിരുന്ന കാനഡ കാർബൺ റിബേറ്റ്, ഫെഡറൽ മലിനീകരണ വിലനിർണ്ണയത്തിൻ്റെ സാമ്പത്തിക ആഘാതം കുറയ്ക്കുന്നതിന് രൂപകൽപ്പന ചെയ്‌തിരിക്കുന്ന നികുതി രഹിത ത്രൈമാസ പേയ്‌മെൻ്റാണ്. ആൽബർട്ട, സസ്കാച്വാൻ, മാനിറ്റോബ, ഒൻ്റാരിയോ, ന്യൂഫിൻലൻഡ് ആൻഡ് ലാബ്രഡോർ, നോവസ്കോഷ, പ്രിൻസ് എഡ്വേഡ് ഐലൻഡ് എന്നിവിടങ്ങളിലെ നിവാസികൾക്ക് കാനഡ കാർബൺ റിബേറ്റിന് അർഹതയുണ്ട്. യോഗ്യരായ എല്ലാവർക്കും അടിസ്ഥാന പേയ്‌മെൻ്റും ഗ്രാമീണ അല്ലെങ്കിൽ ചെറിയ കമ്മ്യൂണിറ്റികളിൽ താമസിക്കുന്നവർക്ക് അധികമായി 20% ഗ്രാമീണ സപ്ലിമെൻ്റും റിബേറ്റിൽ ഉൾപ്പെടുന്നു.
ജനുവരി 15-നെക്കൂടാതെ ഏപ്രിൽ 15, ജൂലൈ 15, ഒക്ടോബർ 15 എന്നീ തീയതികളിലാണ് കാനഡ കാർബൺ റിബേറ്റ് വിതരണം ചെയ്യന്നത്. ഈ പേയ്‌മെൻ്റുകൾ ത്രൈമാസത്തിലൊരിക്കൽ വിതരണം ചെയ്യുന്നു. കൂടാതെ സാധാരണയായി നിർദ്ദിഷ്ട തീയതിയ്ക്ക് ശേഷം ഏതാനും ദിവസങ്ങൾക്കുള്ളിൽ യോഗ്യരായ ആളുകളുടെ ബാങ്ക് അക്കൗണ്ടിൽ എത്തിച്ചേരും.
