ടൊറന്റോ: സ്നാപ് ചാറ്റില്‍ പരിചയപ്പെട്ട പെണ്‍കുട്ടിയുമായി സൗഹൃദം സ്ഥാപിക്കാന്‍ യുവാവ് 16 കാരനായി വേഷം മാറി. സ്‌കാര്‍ബറോ സ്വദേശിയായ തല്‍ഹ ഷെയ്ഖ് (22) എന്ന യുവാവാണ് വേഷം മാറി സൗഹൃദം സ്ഥാപിച്ച് 13കാരിയായ സ്‌കൂള്‍വിദ്യാര്‍ത്ഥിനിയുമായി കൂടിക്കാഴ്ച്ചക്ക് പദ്ധതി ഇട്ടത്. പെണ്‍കട്ടിയുടെ പെരുമാറ്റത്തില്‍ സംശയം തോന്നിയ സ്‌കൂള്‍ അധികൃതര്‍ വിവരം പെലീസില്‍ അറിയിക്കുകയായിരുന്നു. തുടര്‍ന്ന് പൊലിസ് സംഭവസ്ഥലത്ത് പരിശോധന നടത്തിയെങ്കിലും ഇയാളെ കണ്ടെത്താനായില്ല. സാഹചര്യതെളിവുകളുടെ അടിസ്ഥാനത്തില്‍ തല്‍ഹ ഷെയ്ഖിനെതിരെ കേസെടുത്തു തുടര്‍ന്ന് പ്രതിയുടെ വീട്ടിലെത്തി പൊലീസ് ഇയാളെ കസ്റ്റഡിയിലെടുത്തു.
പരിശോധനയില്‍ പ്രതികുറ്റക്കാരനാണെന്ന് തെളിയിക്കുന്ന നിരവധി ഇലക്ട്രോണിക് രേഖകള്‍ പൊലീസ് കണ്ടെടുത്തു. സ്നാപ് ചാറ്റിലൂടെ പരിചയപ്പെട്ട് സ്‌കൂള്‍ വിദ്യാര്‍ത്ഥിനികളായ കൗമാരക്കാരികളോട് സൗഹൃദം സ്ഥാപിക്കുകയും അവരുമായി കൂടിക്കാഴ്ച്ച നടത്തുകയും ചെയ്യുകയാണ് ഇയാള്‍ ആദ്യം ചെയ്യാറെന്ന് പൊലീസ് പറഞ്ഞു. തല്‍ഹ ഷെയ്ഖ് അശ്ലീല ചിത്രങ്ങള്‍ നിര്‍മ്മിച്ചു നല്‍കുന്ന ശൃംഖലയില്‍പെട്ട ആളാണെന്ന് പൊലീസ് കണ്ടെത്തി. ഇയാളുടെ കെണിയില്‍ വേറെയും കുട്ടികള്‍ അകപ്പെട്ടിട്ടുണ്ടോ എന്ന അന്വേഷണത്തിലാണ് ദുര്‍ഹം പെലീസ്.
