വാഷിംഗ്ടണ്‍: യുഎസില്‍ യാത്ര വിമാനവും സൈനിക ഹെലികോപ്റ്ററും കൂട്ടിയിടിച്ചുണ്ടായ അപകടത്തില്‍ മരിച്ചവരുടെ എണ്ണം 28 ആയി. 60 യാത്രക്കാരും 4 ജോലിക്കാരുമുള്ള വിമാനവും 3 പേരുള്ള സൈനിക ഹെലികോപ്റ്ററുമാണു കൂട്ടിയിടിച്ചത്.
അപകടത്തില്‍പ്പെട്ട മറ്റുള്ളവര്‍ക്കായി ഇപ്പോഴും തിരച്ചില്‍ തുടരുകയാണെന്നും എന്നാല്‍ രക്ഷപ്പെട്ട മറ്റാരും ഉണ്ടെന്ന് വിശ്വസിക്കുന്നില്ലെന്നും അധികൃതര്‍ അറിയിച്ചു. വാഷിംഗ്ടണിലെ റീഗന്‍ വിമാനത്താവളത്തിലെ ലാന്‍ഡിങ്ങിനിടെ യാത്രാവിമാനവും സൈന്യത്തിന്റെ ഹെലികോപ്റ്ററും കൂട്ടിയിടിച്ചായിരുന്നു അപകടം. പ്രാദേശിക സമയം രാത്രി 9:30 ഓടെയാണ് അപകടം നടന്നതെന്ന് ഫെഡറല്‍ ഏവിയേഷന്‍ അഡ്മിനിസ്ട്രേഷന്‍ അറിയിച്ചു. അപകടത്തെ തുടര്‍ന്ന്, വിമാനവും ഹെലികോപ്റ്ററും സമീപത്തെ പൊട്ടോമാക് നദിയിലേക്ക് വീഴുകയായിരുന്നു.
അതേസമയം, അതിദാരുണമായ അപകടത്തെപ്പറ്റി അറിഞ്ഞെന്നും വിമാനത്തിലുള്ളവര്‍ക്കായി പ്രാര്‍ത്ഥിക്കുന്നതായി യുഎസ് പ്രസിഡന്റ് ഡോണള്‍ഡ് ട്രംപും വൈസ് പ്രസിഡന്റ് ജെ ഡി വാന്‍സുംപറഞ്ഞു.
