ദുബായ് : ഡിജിറ്റൽ കണ്ടൻ്റ് പ്രൊഡ്യൂസർമാ‍ർക്കും യുഎഇ യിലേക്ക് പറക്കാൻ സുവർണാവസരമൊരുക്കുന്ന പദ്ധതി വരുന്നു. സ്പോൺസറോ, ജോലിയോ ഇല്ലാതെ തന്നെ ഇനി ദുബായിൽ 10 വർഷം വരെ താമസിക്കാം. കണ്ടന്റ് റൈറ്റർമാർ, പോഡ്‌കാസ്റ്റർമാർ, വീഡിയോ പ്രൊഡ്യൂസർമാർ എന്നിവർക്കെല്ലാം ഗോൾഡൻ വീസ നൽകാൻ പദ്ധതിയിടുകയാണ് യുഎഇ. ദുബായിലെ ക്രിയേറ്റേഴ്‌സ് എച്ച്ക്യു എന്ന പുതിയ സംരംഭത്തിലൂടെയാണ് ഡിജിറ്റൽ ഉള്ളടക്ക സ്രഷ്ടാക്കൾക്കായി യുഎഇ ഗോൾഡൻ വീസ പ്രോഗ്രാം വിപുലീകരിക്കുന്നത്. ഇതിലൂടെ ലോകമെമ്പാടുമുള്ള മികച്ച കണ്ടൻ്റ് ക്രിയേറ്റർമാർക്ക് യുഎഇയിൽ താമസിക്കാനും ജോലി ചെയ്യാനുമുള്ള അവസരങ്ങൾ ലഭിക്കും.
എഴുത്തുകാർക്ക് പുറമെ സോഷ്യൽ മീഡിയ പ്ലാറ്റ്‌ഫോമുകളിൽ വീഡിയോ ചെയ്യുന്നവർ, ഓഡിയോകളും, കണ്ടൻ്റും ക്രിയേറ്റുചെയ്യുന്നവ‍ർ എന്നിവർക്കും മികച്ച അവസരങ്ങൾ ലഭിക്കും. ഇതിനായി 2025 ജനുവരി 13-ന് എമിറേറ്റ്സ് ടവേഴ്സിൽ ക്രിയേറ്റേഴ്‌സ് ഹെഡ് ക്വാ‍ർട്ടേഴ്സ് എന്ന സംരംഭം പ്രവർത്തനം ആരംഭിച്ചു. കണ്ടൻ്റ് ക്രിയേറ്റർമാർക്ക് വിഭവങ്ങളും സപ്പോട്ടും വാഗ്ദാനം ചെയ്യുന്ന ഇൻകുബേഷൻ സെന്ററായും ഇത് പ്രവർത്തിക്കുന്നു. ദുബായിലെ ഉയർന്ന നിലവാരമുള്ള ജീവിതശൈലിയ്ക്കൊപ്പം കണ്ടൻ്റ് ക്രിയേറ്റർമാർക്ക് മികച്ച അവസരങ്ങളും ലഭിക്കും. മെറ്റാ, ടിക് ടോക്ക്, എക്സ് എന്നിവയുൾപ്പെടെ പ്രമുഖ സാങ്കേതിക സ്ഥാപനങ്ങളുമായൊക്കെ ഇനിഷ്യേറ്റീവ് പങ്കാളിത്തത്തിൽ ഏർപ്പെട്ടിട്ടുണ്ട്. 20 രാജ്യങ്ങളിൽ നിന്നുള്ള 100 പേരെ ഇതിനോടകം തന്നെ യുഎഇ ക്ഷണിച്ചു കഴിഞ്ഞു.
