ടോം ഹോളണ്ട് നായകനായി എത്തുന്ന സ്‌പൈഡർ മാൻ 4 റിലീസ് തീയതി മാറ്റി. ദി ഹോളിവുഡ് റിപ്പോർട്ടർ റിപ്പോർട്ട് പ്രകാരം മാർവൽ സൂപ്പർഹീറോയുടെ അടുത്ത ചിത്രം നേരത്തെ ഷെഡ്യൂൾ ചെയ്ത റിലീസ് ഡേറ്റ് കഴിഞ്ഞ് ഒരാഴ്ചയ്ക്ക് ശേഷം തീയറ്ററില്‍ എത്തും. പുതിയ റിലീസ് തീയതി അനുസരിച്ച് ജൂലൈ 31-നായിരിക്കും സ്പൈഡര്‍മാന്‍ 4 തിയറ്ററുകളിൽ റിലീസ് ചെയ്യുക. ചിത്രം 2026 ജൂലൈ 24 ന് റിലീസ് ചെയ്യാൻ നേരത്തെ തീരുമാനിച്ചിരുന്നു. ഷാങ്-ചി, ലെജൻഡ് ഓഫ് ദ ടെൻ റിങ്‌സ് എന്നീ ചിത്രങ്ങളിലൂടെ പ്രശസ്തനായ സംവിധായകൻ ഡെസ്റ്റിൻ ഡാനിയൽ ക്രെറ്റൺ തന്നെയാണ് ഈ പ്രൊജക്റ്റ് സംവിധാനം ചെയ്യുന്നതെന്ന് ദി ഹോളിവുഡ് റിപ്പോർട്ടർ റിപ്പോർട്ട് ചെയ്യുന്നു.
റിലീസ് തീയതി മാറ്റിയതോടെ ക്രിസ്റ്റഫർ നോളന്‍റെ ദി ഒഡീസിയിൽ നിന്ന് വലിയൊരു ഇടവേള സ്പൈഡര്‍മാന 4ന് ലഭിക്കും. ടോം ഹോളണ്ട് അഭിനയിക്കുന്ന ഈ ചിത്രം ജൂലൈ 17 ന് തിയേറ്ററുകളില്‍ എത്തും എന്നാണ് പ്രഖ്യാപിച്ചിരിക്കുന്നത്. സ്പൈഡർമാൻ: ഹോംകമിംഗ് (2017), സ്പൈഡർമാൻ: ഫാർ ഫ്രം ഹോം (2019), സ്പൈഡർമാൻ: നോ വേ ഹോം (2021) എന്നീ മൂന്ന് സ്പൈഡർമാൻ ചിത്രങ്ങളിലാണ് ടോം ഹോളണ്ട് പീറ്റർ പാർക്കറായി അഭിനയിച്ചത്.സ്പൈഡര്‍മാന്‍റെ അവസാനത്തെ ചിത്രം ആഗോളതലത്തിൽ 1 ബില്യൺ ഡോളറിലധികം നേടിയിരുന്നു. അതേ സമയം വരാനിരിക്കുന്ന മാര്‍വലിന്‍റെ വണ്ടർ മാൻ മിനിസീരീസ്, ഷാങ്-ചിയുടെ രണ്ടാം ഭാഗം ഇങ്ങനെ നിരവധി പ്രൊജക്ടുകളില്‍ മാര്‍വലുമായി സഹകരിക്കുന്നുണ്ട് ഡെസ്റ്റിൻ ഡാനിയൽ ക്രെറ്റൺ. എന്നാല്‍ ഇപ്പോള്‍ പൂര്‍ണ്ണമായും സ്‌പൈഡർ-മാൻ 4 ലാണ് സംവിധായകന്‍ ശ്രദ്ധിക്കുന്നത്.
