മുംബൈ: രാജ്യാന്തര ഫുട്‌ബോളില്‍നിന്നു വിരമിക്കല്‍ പ്രഖ്യാപിച്ച സുനില്‍ ഛേത്രി വീണ്ടും ഇന്ത്യന്‍ ടീമില്‍ കളിക്കാനൊരുങ്ങുന്നു. വിരമിക്കല്‍ പിന്‍വലിച്ച ഛേത്രി എഎഫ്‌സി ഏഷ്യന്‍ കപ്പ് യോഗ്യതാ മത്സരത്തില്‍ ഇന്ത്യയ്ക്കായി കളിക്കാനിറങ്ങും. 40 വയസ്സുകാരനായ ഛേത്രി മൂന്നാം റൗണ്ടിലെ പോരാട്ടത്തില്‍ ബംഗ്ലദേശിനെതിരെയാണു കളിക്കുക. മാര്‍ച്ച് 25നാണു മത്സരം. ഇന്ത്യന്‍ ഫുട്‌ബോള്‍ ടീം സമൂഹമാധ്യമ അക്കൗണ്ടിലൂടെയാണു സൂപ്പര്‍ താരത്തിന്റെ തിരിച്ചുവരവ് പ്രഖ്യാപിച്ചത്.
രാജ്യാന്തര ഫുട്‌ബോളില്‍നിന്നു വിരമിച്ചെങ്കിലും ഇന്ത്യന്‍ സൂപ്പര്‍ ലീഗില്‍ ബംഗളൂരു എഫ്‌സിക്കായി ഛേത്രി നിലവിലെ സീസണിലും കളിക്കുന്നുണ്ട്. 2024 ജൂണിലാണ് ഛേത്രി വിരമിക്കല്‍ പ്രഖ്യാപിച്ചത്. കുവൈത്തിനെതിരെ സമനില വഴങ്ങിയ ലോകകപ്പ് യോഗ്യതാ മത്സരത്തിലായിരുന്നു ഛേത്രി ഇന്ത്യന്‍ ടീമിനായി ഒടുവില്‍ കളിച്ചത്. ബംഗളൂരു എഫ്‌സിക്കു വേണ്ടി ഈ സീസണില്‍ 12 ഗോളുകള്‍ താരം നേടിയിട്ടുണ്ട്.
ബംഗ്ലദേശിനെതിരായ മത്സരത്തിനു മുന്‍പ് മാര്‍ച്ച് 19 ന് മാലദ്വീപിനെതിരെ ഇന്ത്യ സൗഹൃദ മത്സരം കളിക്കുന്നുണ്ട്. ഈ മത്സരത്തില്‍ ഛേത്രി ഇറങ്ങുമോയെന്നു വ്യക്തമല്ല. 19 വര്‍ഷത്തെ രാജ്യാന്തര ഫുട്‌ബോള്‍ കരിയറില്‍ 150 മത്സരങ്ങളില്‍നിന്ന് 94 ഗോളുകള്‍ ഇതിഹാസ താരം സ്വന്തമാക്കിയിട്ടുണ്ട്.
