ജെറുസലേം: ഇസ്രയേല്‍ സൈന്യം കസ്റ്റഡിയിലെടുത്ത ഓസ്‌കര്‍ ജേതാവായ പലസ്തീന്‍ സംവിധായകന്‍ ഹംദാന്‍ ബല്ലാലിനെ വിട്ടയച്ചു. സൈനിക കേന്ദ്രത്തില്‍ കൈകള്‍ ബന്ധിച്ചും മര്‍ദിച്ചതിനും ശേഷമാണ് വിട്ടയച്ചതെന്ന് ‘നോ അദര്‍ ലാന്‍ഡി’ന്റെ ഇസ്രായേലി സഹസംവിധായകനായ യുവാല്‍ എബ്രഹാം വ്യക്തമാക്കി.
ഹംദാനെ വിട്ടയച്ചെന്നും ഇപ്പോള്‍ ഹെബ്രോണിലെ ആശുപത്രിയില്‍ ചികിത്സയിലാണെന്നും ബല്ലാലിന്റെ ചിത്രം ഇന്‍സ്റ്റാഗ്രാമില്‍ പങ്കിട്ടുകൊണ്ട് മറ്റൊരു സഹസംവിധായകന്‍ ബേസില്‍ അദ്ര പറഞ്ഞു. ശരീരമാസകലം പട്ടാളക്കാരും കുടിയേറ്റക്കാരും ചേര്‍ന്ന് അദ്ദേഹത്തെ മര്‍ദിച്ചുതായി അദ്ദേഹം പറഞ്ഞു. ആക്രമണത്തില്‍ ബല്ലാലിന് ഗുരുതരമായി പരുക്കേറ്റിട്ടുണ്ട്.
ഓസ്‌കര്‍ പുരസ്‌കാരത്തിന് അര്‍ഹമായ ഡോക്യുമെന്ററി ‘നോ അതര്‍ ലാന്‍ഡി’ന്റെ നാല് സംവിധായകരിലൊരാളാണ് ഹംദാന്‍ ബല്ലാല്‍. ഇയാള്‍ക്ക് നേരെ കഴിഞ്ഞദിവസമാണ് ഇസ്രായേലി കുടിയേറ്റക്കാരുടെ ആക്രമണമുണ്ടാകുന്നത്. മുഖംമൂടി ധരിച്ചെത്തിയ കുടിയേറ്റക്കാര്‍ വീട്ടില്‍ കയറി ആക്രമിക്കുകയായിരുന്നുവെന്നും തുടര്‍ന്ന് ബല്ലാലിനെ ഇസ്രയേല്‍ സേന വെസ്റ്റ് ബാങ്കിലെ സുസിയ ഗ്രാമത്തിലുള്ള അജ്ഞാത കേന്ദ്രത്തിലേക്ക് കൊണ്ടുപോയതായും കുടുംബം ആരോപിച്ചിരുന്നു.
97-ാമത് ഓസ്‌കര്‍ പുരസ്‌കാര ചടങ്ങില്‍ മികച്ച ഡോക്യുമെന്ററി- ഫീച്ചര്‍ വിഭാഗത്തിലാണ് ‘നോ അദര്‍ ലാന്‍ഡ്’ പുരസ്‌കാരം നേടിയത്. ബാസല്‍ അദ്ര, ഹംദാന്‍ ബല്ലാല്‍, യുവാല്‍ അബ്രഹാം, റേച്ചല്‍ സോര്‍ എന്നിവര്‍ ആദ്യമായി സംവിധാനം ചെയ്ത ഡോക്യുമെന്ററി ചിത്രമായിരുന്നു ഇത്. സംവിധായകനായ ബാസെല്‍ അദ്രയാണ് ഡോക്യുമെന്ററിയിലെ പ്രധാന കഥാപാത്രമായി അഭിനയിച്ചത്.
