ടൊറൻ്റോ : വെള്ളിയാഴ്ച രാത്രി സ്കാർബ്റോയിൽ വാഹനമിടിച്ച് 32 വയസ്സുള്ള യുവതി മരിച്ചു. രാത്രി ഒമ്പത് മണിയോടെ ഫാർമസി അവന്യൂവിന് കിഴക്ക് ബ്രിഡിൽവുഡ് ബൊളിവാർഡിന് സമീപമുള്ള ഷെപ്പേർഡ് അവന്യൂവിലാണ് സംഭവം.
അപകടത്തിൽ ഗുരുതരമായി പരുക്കേറ്റ യുവതി സംഭവസ്ഥലത്ത് തന്നെ മരിച്ചതായി സ്ഥിരീകരിച്ചു. യുവതിയെ ഇടിച്ച വാഹനം നിർത്താതെ പോയതായി ടൊറൻ്റോ പൊലീസ് അറിയിച്ചു. മുൻവശത്തും വിൻഡ്ഷീൽഡിനും കേടുപാടുകൾ സംഭവിക്കാൻ സാധ്യതയുള്ള വാഹനമാണ് അപകടത്തിന് കാരണമായതെന്ന് അധികൃതർ റിപ്പോർട്ട് ചെയ്തു. ഷെപ്പേർഡ് അവന്യൂവിലാണ് വാഹനം അവസാനമായി കണ്ടത്. അപകടത്തെക്കുറിച്ചോ സംഭവത്തിൽ ഉൾപ്പെട്ട വാഹനത്തെക്കുറിച്ചോ എന്തെങ്കിലും വിവരം ലഭിക്കുന്നവർ അന്വേഷണ ഉദ്യോഗസ്ഥരുമായി ബന്ധപ്പെടണമെന്ന് പൊലീസ് അഭ്യർത്ഥിച്ചു.
