ഓട്ടവ : കാനഡയിൽ പ്രായമാകുന്നവർ വർധിക്കുന്നതിനൊപ്പം വിരമിക്കൽ ആശങ്കകളും കൂടുന്നതായി റിപ്പോർട്ട്. ഭൂരിഭാഗം പേർക്കും സാമ്പത്തികമായി വിരമിക്കാൻ സാധിക്കില്ലെന്ന് ഹെൽത്ത്കെയർ ഓഫ് ഒന്റാരിയോ പെൻഷൻ പ്ലാൻ (HOOPP) ഏപ്രിൽ മാസത്തിൽ നടത്തിയ വാർഷിക കനേഡിയൻ റിട്ടയർമെന്റ് സർവേ ചൂണ്ടിക്കാണിക്കുന്നു. സർവേ പ്രകാരം, വിരമിക്കാത്തവരിൽ 59% പേരും സാമ്പത്തികമായി വിരമിക്കാൻ കഴിയില്ലെന്ന് വിശ്വസിക്കുന്നു. അതേസമയം, വിരമിച്ചാലും, സാമ്പത്തികമായി സ്വയം നിലനിൽക്കാൻ ജോലി തുടരേണ്ടി വരുമെന്നും പങ്കെടുത്തവരിൽ 66% പേർ അഭിപ്രായപ്പെട്ടു.
വിരമിക്കലിനായി പണം ലാഭിക്കാൻ മാർഗ്ഗങ്ങളില്ലെന്ന് പല കാനഡക്കാരും സൂചിപ്പിച്ചതായി സർവേ കണ്ടെത്തി. 60% പേർക്ക് അധിക വരുമാനമില്ലെന്നും, സമ്പാദിക്കുന്ന പണം മുഴുവൻ അത്യാവശ്യ കാര്യങ്ങൾക്കായി ചിലവഴിക്കുന്നുവെന്നും റിപ്പോർട്ട് പറയുന്നു. 49% പേർ കഴിഞ്ഞ വർഷം വിരമിക്കലിനായി പണം മാറ്റിവെച്ചിട്ടില്ല. അതേസമയം, 39% പേർക്ക് വിരമിക്കലിനു ശേഷം ഒട്ടും പണം എടുക്കാനുണ്ടാവില്ലെന്ന് സർവേ വ്യക്തമാക്കുന്നു.
ദൈനംദിന ചിലവുകൾ, സാമ്പത്തിക അനിശ്ചിതത്വം, പണപ്പെരുപ്പം, സർക്കാർ ആരോഗ്യ സേവനങ്ങളിലെ വെട്ടിക്കുറവ് തുടങ്ങിയവയാണ് കാനഡക്കാരുടെ ദാരിദ്ര്യത്തിന് കാരണം. 2023-ലെ 48 ശതമാനത്തിൽ നിന്ന്, 55% കനേഡിയൻ പൗരന്മാരുടെയും ഇപ്പോഴത്തെ സാമ്പത്തിക സ്ഥിതി ‘ശമ്പളത്തിനൊത്ത് ജീവിക്കുക’ എന്നതാണെന്ന് പറയുന്നു.
