വിനിപെഗ് : കാനഡയുടെ പരമോന്നത സിവിലിയൻ ബഹുമതിയായ ഓർഡർ ഓഫ് കാനഡ മാനിറ്റോബ ബന്ധമുള്ള മൂന്ന് പ്രമുഖർക്ക് ലഭിക്കും. ഗവർണർ ജനറൽ മേരി സൈമൺ തിങ്കളാഴ്ച 83 പുതിയ വ്യക്തികളെയാണ് ‘ഓർഡർ ഓഫ് കാനഡ’യിലേക്ക് നിയമിച്ചത്. പ്രശസ്ത നോവലിസ്റ്റായ മിറിയം ടോവ്സിനെ ഓർഡർ ഓഫ് കാനഡയുടെ ഓഫീസറായി തിരഞ്ഞെടുത്തു. “എ കോംപ്ലിക്കേറ്റഡ് കൈൻഡ്നെസ്”, “വിമൻ ടോക്കിങ്” തുടങ്ങിയ നോവലുകളിലൂടെയാണ് ഇവർ ശ്രദ്ധേയയായത്. പ്രതികൂല സാഹചര്യങ്ങളെ അതിജീവിച്ച്, കഥകൾ അവതരിപ്പിക്കാനുള്ള അവരുടെ കഴിവ് വായനക്കാർക്ക് വലിയ പ്രചോദനമാണെന്ന് നോമിനേഷൻ പ്രസ്താവനയിൽ പറയുന്നു. ടൊറന്റോയിൽ താമസിക്കുന്ന ടോവ്സ് സ്റ്റെയിൻബാക്ക് സ്വദേശിയാണ്.
അതേസമയം, വിനിപെഗിൽ നിന്നുള്ള മറ്റ് രണ്ട് പേർക്ക് ‘മെമ്പർ ഓഫ് ദി ഓർഡർ ഓഫ് കാനഡ’ ബഹുമതി ലഭിച്ചു. മാനിറ്റോബയുടെ ബയോടെക്നോളജി വ്യവസായം കെട്ടിപ്പടുക്കുന്നതിലെ സംഭാവനകൾക്ക് ആൽബർട്ട് ഫ്രൈസനും, പാരമ്പര്യ രക്തസ്രാവ രോഗമുള്ള ആളുകളുടെ പരിചരണം മെച്ചപ്പെടുത്തുന്നതിൽ പതിറ്റാണ്ടുകളോളം പ്രവർത്തിച്ചതിന് കാത്തി മുൾഡർയ്ക്കും ബഹുമതി ലഭിച്ചു. വേൾഡ് ഫെഡറേഷൻ ഓഫ് ഹീമോഫീലിയയുടെ മസ്കുലോസ്കെലെറ്റൽ കമ്മിറ്റിയുടെ അധ്യക്ഷയായ ആദ്യ വനിതയും ഫിസിയോതെറാപ്പിസ്റ്റും കനേഡിയനുമാണ് കാത്തി മുൾഡർ.
മുൻ ചീഫ് പബ്ലിക് ഹെൽത്ത് ഓഫീസർ ഡോ. തെരേസ ടാം, NHL കളിക്കാരനും പരിശീലകനുമായ ടെഡ് നോലൻ, MMA ഇതിഹാസം ജോർജസ് സെന്റ്-പിയർ എന്നിവരാണ് ‘ഓർഡർ ഓഫ് കാനഡ’ ലഭിച്ച മറ്റ് പ്രമുഖർ. പുരസ്കാര ദാന ചടങ്ങ് പിന്നീട് നടക്കും.
