വാഷിങ്ടണ്‍: അമേരിക്കന്‍ പ്രസിഡന്റ് ഡോണള്‍ഡ് ട്രംപിനെ നോബേല്‍ സമ്മാനത്തിന് നാമനിര്‍ദ്ദേശം ചെയ്ത് ഇസ്രയേല്‍ പ്രധാനമന്ത്രി ബെഞ്ചമിന്‍ നെതന്യാഹു. വൈറ്റ് ഹൗസില്‍ നടന്ന അത്താഴവിരുന്നിനിടെ യുഎസ് പ്രസിഡന്റ് ഡൊണാള്‍ഡ് ട്രംപിനെ സമാധാനത്തിനുള്ള നോബേല്‍ സമ്മാനത്തിന് നാമനിര്‍ദ്ദേശം ചെയ്ത കത്ത് നെതന്യാഹു നേരിട്ട് നല്‍കി.
‘ട്രംപ് ഓരോ രാജ്യത്തും ഓരോ പ്രദേശത്തുമായി സമാധാനം കെട്ടിപ്പടുക്കുകയാണ്.ഗാസയിലെ ഇസ്രായേലും ഹമാസും തമ്മിലുള്ള യുദ്ധം ഉള്‍പ്പെടെ ലോകമെമ്പാടുമുള്ള സംഘര്‍ഷങ്ങള്‍ അവസാനിപ്പിക്കാനുള്ള അദ്ദേഹത്തിന്റെ ശ്രമങ്ങള്‍ക്ക് അര്‍ഹമായ ഒന്നാണിത്, മിസ്റ്റര്‍ പ്രസിഡന്റ്, ഞാന്‍ നോബേല്‍ സമ്മാന കമ്മിറ്റിക്ക് അയച്ച കത്ത് നിങ്ങള്‍ക്ക് മുന്നില്‍ കാണിക്കാന്‍ ആഗ്രഹിക്കുന്നു. നിങ്ങള്‍ അതിന് അര്‍ഹനാണ്’..നെതന്യാഹു പറഞ്ഞു. ഇസ്രായേലികള്‍ക്ക് മാത്രമല്ല,ജൂതജനതക്കും ലോകത്തെ എല്ലാ ജനങ്ങള്‍ക്കം വേണ്ടി താങ്കളുടെ പ്രവര്‍ത്തനത്തെ അഭിനന്ദിക്കുന്നുവെന്നും നെതന്യാഹു കൂട്ടിച്ചേര്‍ത്തു.
നോബേലിന് നാമനിര്‍ദേശം ചെയ്ത നെതന്യാഹുവിനോട് ട്രംപ് നന്ദി പറഞ്ഞു.’വളരെ നന്ദി ..എനിക്ക് ഇതിനെക്കുറിച്ച് അറിയില്ലായിരുന്നു’. വളരെ അര്‍ഥപൂര്‍ണമായ നടപടിയാണ് താങ്കളുടെ ഭാഗത്ത് നിന്നുണ്ടായതെന്നും ട്രംപ് പറഞ്ഞു. ‘ഞാന്‍ യുദ്ധങ്ങള്‍ നിര്‍ത്തുകയാണ്. ആളുകള്‍ കൊല്ലപ്പെടുന്നത് കാണുന്നതിനെ ഞാന്‍ വെറുക്കുന്നു.. ‘..ട്രംപ് പറഞ്ഞു.
ഈ വര്‍ഷം ട്രംപുമായുള്ള മൂന്നാമത്തെ കൂടിക്കാഴ്ചയാണ് ഇസ്രായേല്‍ പ്രധാനമന്ത്രി തിങ്കളാഴ്ച വൈറ്റ് ഹൗസില്‍ നടത്തിയത്. വെടിനിര്‍ത്തല്‍ കരാറില്‍ ശേഷിക്കുന്ന എല്ലാ തടവുകാരെയും മോചിപ്പിക്കുന്ന കാര്യം ഉറപ്പാക്കണമെന്ന് ഹമാസ് ബന്ദികളുടെ കുടുംബങ്ങള്‍ ഇരു നേതാക്കളോടും ആവശ്യപ്പെടുന്ന സമയത്താണ് കൂടിക്കാഴ്ച. ഇസ്രയേലും ഹമാസും തമ്മില്‍ സമാധാന കരാര്‍ ഉണ്ടാക്കാന്‍ ട്രംപ് മാസങ്ങളായി ശ്രമിച്ചുകൊണ്ടിരിക്കുകയാണ്. ഈ വാരാന്ത്യത്തില്‍ ഗസ്സയില്‍ വെടിനിര്‍ത്തല്‍ ആരംഭിക്കാനാണ് ട്രംപ് നിര്‍ദേശിക്കുന്നത്. ഇറാനുമായും ചര്‍ച്ച നടത്തുമെന്ന് ട്രംപ് സ്ഥീരീകരിച്ചു.
