ടൊറൻ്റോ : രാജ്യത്തുടനീളമുള്ള വിതരണ ശൃംഖലയിലെ പ്രശ്നങ്ങൾക്ക് കാരണമായ റെയിൽ പണിമുടക്ക് രണ്ടാം ദിനവും സാധാരണ ജനങ്ങളെ വലയ്ക്കുന്നു. തൊഴിൽ തർക്കം അവസാനിപ്പിക്കാൻ ഫെഡറൽ ഗവൺമെൻ്റ് ശ്രമം ആരംഭിച്ചെങ്കിലും ടൊറൻ്റോ മിൽട്ടൺ ലൈനിലെയും ഹാമിൽട്ടൺ GO സ്റ്റേഷനിലെയും GO ട്രെയിൻ സർവീസ് താൽക്കാലികമായി നിർത്തിവച്ചിരിക്കുന്നതിനാൽ തുടർച്ചയായി രണ്ടാം ദിവസവും യാത്രക്കാർ ബദൽ റൂട്ടുകൾ കണ്ടെത്താൻ നിർബന്ധിതരായി.
മിൽട്ടൺ GO ലൈൻ ഉപയോക്താക്കളെയാണ് GO ട്രെയിൻ സർവീസ് റദ്ദാക്കൽ സാരമായി ബാധിച്ചത്. പണിമുടക്ക് ബാധിച്ച ട്രാഫിക് കൺട്രോൾ ഓപ്പറേറ്റർമാർ എപ്പോൾ ജോലിയിൽ പ്രവേശിക്കുമെന്ന് കനേഡിയൻ പസഫിക് കൻസാസ് സിറ്റി ലിമിറ്റഡ് (സിപികെസി) അറിയിച്ചിട്ടില്ലാത്തതിനാൽ സർവീസ് പുനരാരംഭിക്കുന്നില്ലെന്ന് മെട്രോലിൻക്സ് വ്യക്തമാക്കിയിരുന്നു. ഹാമിൽട്ടൺ GO സ്റ്റേഷനിൽ വെള്ളിയാഴ്ചയും ട്രെയിനുകൾക്കും സ്റ്റോപ്പുണ്ടായിരിക്കില്ല. സർവീസ് താൽക്കാലികമായി നിർത്തിവച്ചിരിക്കുന്ന സാഹചര്യത്തിൽ ലോക്കൽ ട്രാൻസിറ്റ് ഓപ്‌ഷനുകൾ പരിഗണിക്കാനോ ലേക്ഷോർ വെസ്റ്റിലോ കിച്ചനർ ലൈനിലോ GO ട്രാൻസിറ്റ് സർവീസ് ഉപയോഗിക്കാനോ Metrolinx മിൽട്ടൺ ലൈനിലെ ഉപയോക്താക്കളോട് നിർദ്ദേശിച്ചു. എന്നാൽ, മറ്റെല്ലാ GO ലൈനുകളെയും യുപി എക്സ്പ്രസ്, ലേക്ഷോർ വെസ്റ്റ് ലൈൻ സ്റ്റേഷനുകളെയും പണിമുടക്ക് ബാധിച്ചിട്ടില്ല.
