ഹാലിഫാക്സ് : കെയ്പ് ബ്രെറ്റൺ മുനിസിപ്പാലിറ്റിയിലെ ഗ്ലേസ് ബേ കമ്മ്യൂണിറ്റിയിലെ ജനങ്ങൾ ജലനിയന്ത്രണം പാലിക്കണമെന്ന് മേയർ അമൻഡ മക്ഡൗഗൽ. ഗ്ലേസ് ബേ ജലശുദ്ധീകരണ പ്ലാൻ്റിൽ നിന്നും നഗരത്തിലേക്കുള്ള പ്രധാന ജലവിതരണ പൈപ്പിൽ അറ്റകുറ്റപ്പണികൾ നടക്കുന്നതിനാൽ ഇന്ന് ഉച്ചയ്ക്ക് പന്ത്രണ്ടരയോടെ അടിയന്തര ജാഗ്രതാ നിർദേശം നൽകി. ഗ്ലേസ് ബേ, ഡൊമിനിയൻ, റിസർവ് മൈൻസ്, ബിർച്ച് ഗ്രോവ്, പോർട്ട് മോറിയൻ, ഡോൺകിൻ, ടവർ റോഡ് എന്നിവിടങ്ങളിൽ നിയന്ത്രണം ബാധകമായിരിക്കും.
പ്രധാന ജലവിതരണ പൈപ്പിൽ കഴിഞ്ഞ രണ്ട് ദിവസങ്ങളിലായി രണ്ട് തകരാറുകൾ ഉണ്ടായിട്ടുണ്ടെന്ന് മേയർ അറിയിച്ചു. രണ്ടു തകരാറുകളും കണ്ടെത്തിയിട്ടുണ്ടെന്നും അറ്റകുറ്റപ്പണികൾ നടക്കുന്നുണ്ടെന്നും അവർ പറഞ്ഞു. പണികൾ എപ്പോൾ പൂർത്തിയാകുമെന്ന് വ്യക്തമല്ല. ജലസംരക്ഷണത്തിനാണ് ഇപ്പോൾ മുൻഗണന നൽകുന്നതെന്നും അവർ വ്യക്തമാക്കി.
