ഫ്രെഡറിക്ടൺ: സെൻ്റ് ജോണിലെ ജയിലിൽ നിന്ന് ഒരു തടവുകാരൻ ജയിൽ ചാടിയതായി ന്യൂ ബ്രൺസ്‌വിക്ക് പൊലീസ്. ഇന്ന് രാവിലെയാണ് നാല്പത്തിനാല് വയസ്സുള്ള ഡാരൽ ഡാൽഗ്ലീഷ് എന്നയാൾ ജയിലിന്റെ മതിൽ ചാടി രക്ഷപ്പെട്ടതെന്ന് സെൻ്റ് ജോൺ പൊലീസ് ഫോഴ്‌സ് അറിയിച്ചു. ആക്രമണം, വിടുതൽ ഉത്തരവുകൾ ലംഘിക്കൽ എന്നീ കുറ്റങ്ങൾക്ക് ശിക്ഷ അനുഭവിച്ചു വരികയായിരുന്നു. ഡോഗ് സ്‌ക്വാഡ് യൂണിറ്റിൻ്റെയും ഡ്രോണിൻ്റെയും സഹായത്തോടെ പട്രോളിംഗ് ഉദ്യോഗസ്ഥർ പ്രദേശത്ത് തിരച്ചിൽ നടത്തി.
ഇളം നീല നിറത്തിൽ താഴെ ഓറഞ്ച് വരുന്ന ജയിൽ യൂണിഫോമായിരുന്നു ജയിൽ ചാടിയ സമയത്ത് പ്രതി ധരിച്ചിരുന്നത്. ഡാൽഗ്ലീഷിനെ കാണുകയോ എവിടെയാണെന്ന് വിവരം ലഭിക്കുകയോ ചെയ്താൽ അറിയിക്കണമെന്ന് പൊലീസ് അഭ്യർത്ഥിച്ചു.
