ജൊഹാനസ്ബര്‍ഗ്: ഇന്ത്യ ദക്ഷിണാഫ്രിക്ക ടി-20 മത്സരത്തില്‍ ഓപ്പണര്‍ സഞ്ജു സാംസണ്‍ന്റെയും തിലക് വര്‍മയുടെയും സെഞ്ച്വറികളുടെ തിളക്കത്തിലാണ് ഇന്ത്യ മിന്നും പ്രകടനം കാഴ്ച്ചവെച്ചത്.രണ്ട് ഫുള്‍ മെമ്പര്‍ അംഗങ്ങള്‍ക്കിടയിലെ മത്സരത്തില്‍ ഒരു ഇന്നിങ്‌സില്‍ രണ്ട് സെഞ്ചറി പിറക്കുന്നത് ചരിത്രത്തിലെ ആദ്യ സംഭവം തന്നെയാണ്.14.1 ഓവറില്‍ 200 കടന്ന ഇന്ത്യ തിരുത്തിക്കുറിച്ചത് സ്വന്തം റെക്കോര്‍ഡ് തന്നെയാണ്.
സഞ്ജു വി സാംസണും തിലക് വര്‍മ്മയും വ്യക്തിഗത സെഞ്ചുറികളും കൂട്ടുകെട്ട് ഇരട്ട സെഞ്ചുറിയും നേടിയതോടെ ഇന്ത്യ മൊത്തം നേടിയത് ഒരു വിക്കറ്റ് നഷ്ടത്തില്‍ 283 റണ്‍സ്. 56 പന്തില്‍നിന്ന് സഞ്ജു പുറത്താവാതെ 109 റണ്‍സ് നേടി. 47 പന്തില്‍നിന്ന് തിലക് വര്‍മ 120 റണ്‍സുമെടുത്തു. 210 റണ്‍സാണ് രണ്ടാം വിക്കറ്റില്‍ ഇരുവരും ചേര്‍ന്ന് നടത്തിയത്.
ടോസ് നേടി ബാറ്റിങ് തിരഞ്ഞെടുത്ത ഇന്ത്യക്കായി സഞ്ജു കരുതലോടെയാണ് കളിച്ചു തുടങ്ങിയത്. എന്നാല്‍ പിന്നീട് കത്തിക്കയറുന്നതാണ് ആരാധകര്‍ക്ക് കാണാനായത്. 28 പന്തുകളില്‍ അര്‍ധസെഞ്ചുറിയും 51 പന്തുകളില്‍ സെഞ്ചുറിയും തികച്ചു. ഒന്‍പത് സിക്സും ആറ് ഫോറും ചേര്‍ന്നതാണ് സഞ്ജുവിന്റെ ഇന്നിങ്സ്. പത്ത് സിക്സും ഒന്‍പത് ഫോറും ചേര്‍ത്ത് 120 നേടിയ തിലക് വര്‍മയാണ് ഇന്ത്യയുടെ ടോപ് സ്‌കോറര്‍. 18 പന്തില്‍ നാല് സിക്സും രണ്ട് ഫോറും ചേര്‍ത്ത് 36 റണ്‍സെടുത്ത അഭിഷേക് ശര്‍മയുടെ വിക്കറ്റ് മാത്രമാണ് ഇന്ത്യക്ക് നഷ്ടമായത്.
ഇന്ത്യയുടെ രണ്ടാമത്തെ ഏറ്റവും ഉയര്‍ന്ന ടി-20 സ്‌കോറാണിത്. ഒന്നാമത്തേതും ദക്ഷിണാഫ്രിക്കയ്ക്കെതിരേയായിരുന്നു. രണ്ടിലും സഞ്ജുവിന്റെ സെഞ്ചുറിയുണ്ട് എന്നതും എടുത്തുപറയേണ്ടതാണ്. ടി-20 ചരിത്രത്തതില്‍ ഒരു കലണ്ടര്‍ വര്‍ഷത്തില്‍ മൂന്ന് സെഞ്ചുറി നേടുന്ന ആദ്യതാരമാണ് സഞ്ജുസാംസണ്‍. ഐ.സി.സി. ഫുള്‍ മെമ്പേഴ്സ് തമ്മില്‍ നടക്കുന്ന ഒരു മത്സരത്തിലെ ഒരിന്നിങ്സില്‍ രണ്ട് സെഞ്ചുറികള്‍ പിറന്ന ആദ്യമത്സരവും ഇതുതന്നെ.നാലോവറില്‍ 58 റണ്‍സ് വഴങ്ങി ഒരു വിക്കറ്റെടുത്ത ലുതോ സിപംലയാണ് ഏറ്റവും കൂടുതല്‍ റണ്‍സ് വിട്ടുനല്‍കിയത്.
യാന്‍സന്‍, കോട്സി, സിമിലനെ തുടങ്ങിയവരെല്ലാം നല്ല ബാറ്റിങിന്റെ ചൂടറിഞ്ഞു. ക്യാപ്റ്റന്‍ മാര്‍ക്രം രണ്ടോവറില്‍ 30 റണ്‍സ് വഴങ്ങി. തിലക് വര്‍മയും സഞ്ജുവും ചേര്‍ന്ന് രണ്ടാം വിക്കറ്റില്‍ 210 റണ്‍സിന്റെ കൂട്ടുകെട്ട് ഉയര്‍ത്തി. 23 സിക്സുകള്‍ ചേര്‍ന്നതാണിത്. തിലകിന്റെ തുടര്‍ച്ചയായ രണ്ടാം സെഞ്ചുറിയാണിത്
