ഡിജിറ്റൽ ഗാഡ്ജറ്റുകൾ ഒഴിവാക്കാനാകാത്ത കാലഘട്ടത്തിലാണ് നാം ജീവിക്കുന്നത്. മൊബൈൽ ഫോണുകളും, ലാപ്ടോപ്പും ഇല്ലാതെ ഒരു ദിവസം കടന്നുപോകുക എന്നത് തന്നെ പ്രയാസമാണ് അത്രത്തോളം ഈ ഉപകരണങ്ങൾ നമ്മുടെ ജീവിതത്തിൽ ഇഴകിച്ചേർന്നിരിക്കുന്നു. നിരന്തരം ഈ ഉപകരണങ്ങളിൽ അഭിരമിച്ചിരിക്കുന്നവരാണ് നിങ്ങളെങ്കിൽ സൂക്ഷിക്കണം ഇവ നമ്മുടെ ആരോഗ്യത്തിനെ ദോഷകരമായി ബാധിക്കും.
കാഴ്ചക്കുറവ്, കഴുത്തിന് വേദന, ഉറക്കക്കുറവ് മുതലായ പ്രശ്നങ്ങൾക്ക് ഡിജിറ്റൽ ഗാഡ്ജറ്റുകളുടെ അനിയന്ത്രിതമായ ഉപയോഗം കാരണമാകും. ഇവയുടെ നിരന്തര ഉപയോഗം കണ്ണുകളെ വളരെ മോശമായി ബാധിക്കും. ഒരുപാടുനേരം സ്ക്രീൻ ടൈം എടുക്കുന്നത് കണ്ണിനും കാഴ്ചയ്ക്കും പ്രശ്നങ്ങൾ സൃഷ്ടിക്കും. ഇത്തരം അസ്വസ്ഥതകളെയാണ് കംപ്യൂട്ടർ വിഷൻ സിൻഡ്രോം എന്ന് വിളിക്കുന്നത്.
കണ്ണിൻ്റെ ഈർപ്പം നഷ്ടമാകൽ, കണ്ണിനുചുറ്റും വേദന, കാഴ്ച മങ്ങൽ, തലവേദന മുതയലായവയാണ് കംപ്യൂട്ടർ വിഷൻ സിൻഡ്രത്തിന്റെ ലക്ഷണങ്ങൾ.
ദീർഘനേരം ഇമചിമ്മാതെ സ്ക്രീനിൽ നോക്കുമ്പോൾ കണ്ണിലെ ജലാംശം കുറയും. കൺതടങ്ങൾ വരളാനും വേദനയ്ക്കും ഇത് കാരണമാകും. ഇതോ‍ടൊപ്പം ശീതീകരിച്ച മുറിയിൽ ദീർഘനേരം ഇരിക്കുന്നതും ഫാനിന് ചുവട്ടിൽ ഇരിക്കുന്നതും പ്രശ്നം സങ്കീർണമാക്കും.
ഡിജിറ്റൽ ഗാഡ്ജറ്റുകൾ ഉപ.യോഗിക്കുമ്പോൾ ശ്രദ്ധിക്കേണ്ട കാര്യങ്ങൾ
കണ്ണിനോട് ചേർത്ത് മൊബൈൽ ഫോൺ പിടിക്കരുത്.
കണ്ണിൽ നിന്ന് പരമാവധി രണ്ടടി അകലമെങ്കിലും പാലിച്ച് ഫോൺ ഉപയോഗിക്കുക.
കണ്ണിൻ്റെ അതേ നിരപ്പിൽ ഫോൺ ക്രമീകരിക്കുക.
ഫോണിലെ വെളിച്ചം മുറിയിലെ വെളിച്ചത്തിനനുസരിച്ച് ക്രമീകരിക്കുക.
ആവശ്യമുള്ള സമയത്തുമാത്രം ഫോൺ ഉപയോഗിക്കുക.
ആവശ്യമില്ലാത്ത ആപ്പുകളുടെ നോട്ടിഫിക്കേഷനുകൾ സൈലന്റ് ആക്കുക.
രാവിലെ ഉണർന്ന ഉടൻ ഫോൺ നോക്കുന്ന ശീലം ഒഴിവാക്കുക.
