ഓട്ടവ : ഇനി മുതൽ പേരന്‍റസിനും ഗ്രാൻഡ് പേരന്‍റസിനും കാനഡയിലെ അവരുടെ മക്കളെയും ചെറുമക്കളെയും സന്ദർശിക്കാനും അവർക്കൊപ്പം താമസിക്കാനും എളുപ്പമാകും. പേരന്‍റസിനും ഗ്രാൻഡ് പേരന്‍റസിനുമുള്ള കാനഡയുടെ സൂപ്പർ വീസയ്ക്കുള്ള ആരോഗ്യ ഇൻഷുറൻസ് യോഗ്യതാ മാനദണ്ഡങ്ങളിൽ വരുത്തിയ ഇളവിലൂടെയാണ് ഈ നേട്ടം കൈവരിക്കാനാകുന്നത്.
ജനുവരി 28 മുതൽ, കനേഡിയൻ സൂപ്പർ വീസയ്ക്ക് അപേക്ഷിക്കുന്ന പേരന്‍റസിനും ഗ്രാൻഡ് പേരന്‍റസിനും ആരോഗ്യ ഇൻഷുറൻസ് മാനദണ്ഡങ്ങൾക്കായുള്ള തെളിവിനായി കനേഡിയൻ ഇതര ഇൻഷുറർമാരിൽ നിന്ന് ആരോഗ്യ ഇൻഷുറൻസ് പ്ലാനുകൾ സ്വീകരിക്കാം. ഈ മാറ്റത്തിന് മുമ്പ്, സൂപ്പർ വീസ യോഗ്യതയ്ക്കുള്ള ആരോഗ്യ ഇൻഷുറൻസ് ഒരു കനേഡിയൻ ദാതാവ് മുഖേന വാങ്ങേണ്ടിയിരുന്നു. കാനഡയിലേക്കുള്ള ഓരോ പ്രവേശനത്തിലും സൂപ്പർ വീസ ഉടമകൾക്ക് അവരുടെ സ്വന്തം സ്വകാര്യ ആരോഗ്യ ഇൻഷുറൻസ് ഉണ്ടായിരിക്കണം.
സൂപ്പർ വീസ
സൂപ്പർ വീസ എന്നത് മക്കളെയും ചെറുമക്കളെയും സന്ദർശിക്കാനും അവർക്കൊപ്പം താമസിക്കാനുമുള്ള രക്ഷാകർതൃ വീസയാണ്. ഒരു തവണ അപേക്ഷിച്ചാൽ രണ്ട് വർഷം വരെ നീണ്ടുനിൽക്കുന്ന സന്ദർശനങ്ങൾ അനുവദിക്കും. കൂടാതെ, വീസ കാലാവധി കഴിയുമ്പോൾ അപേക്ഷകന് വീസ പുതുക്കാൻ കഴിയും. സാധാരണ സന്ദർശക വീസയുമായി താരതമ്യപ്പെടുത്തുമ്പോൾ, സൂപ്പർ വീസ കൂടുതൽ ദൈർഘ്യമേറിയ താമസം അനുവദിക്കുന്നു.
സൂപ്പർ വീസ ലഭിക്കാൻ യോഗ്യതാ ചില മാനദണ്ഡങ്ങൾ പാലിക്കണം. സൂപ്പർ വീസയ്ക്ക് അപേക്ഷിക്കുന്നവർ കനേഡിയൻ പൗരനോ കാനഡയിലെ സ്ഥിര താമസക്കാരനോ ആയ വ്യക്തിയുടെ പേരന്‍റസോ ഗ്രാൻഡ് പേരന്‍റസോ ആയിരിക്കണം. കൂടാതെ സൂപ്പർ വീസ ലഭിക്കുന്നതിന് കാനഡയിൽ നിന്നുള്ള നിങ്ങളുടെ കുട്ടിയുടെയോ പേരക്കുട്ടിയുടെയോ ഇൻവിറ്റേഷൻ ലെറ്റർ ആവശ്യമാണ്. ഈ കത്തിൽ കാനഡയിലെ നിങ്ങളുടെ താമസ കാലയാളവിൽ സാമ്പത്തിക പിന്തുണ ഉറപ്പ് നൽകണം. വീട്ടിലെ കുടുംബാംഗങ്ങളുടെ എണ്ണവും അവരുടെ പേരുകളും കത്തിൽ ഉണ്ടായിരിക്കണം. ഇൻവിറ്റേഷൻ നൽകുന്ന വ്യക്തിയുടെ കനേഡിയൻ പൗരത്വത്തിന്‍റെയോ സ്ഥിര താമസത്തിന്‍റെയോ തെളിവിന്‍റെ ഫോട്ടോകോപ്പിയും അപേക്ഷയുടെ കൂടെ സമർപ്പിക്കണം.
