ന്യൂഡെല്‍ഹി: ഇന്ത്യയിലെ തിരഞ്ഞെടുപ്പില്‍ ഇടപെടാന്‍ യുഎസ് എയിഡ് ഫണ്ട് ഉപയോഗിച്ചത് ആശങ്കാജനകമെന്ന് വിദേശകാര്യമന്ത്രി എസ് ജയശങ്കര്‍. ആര്‍ക്കാണ് കിട്ടിയതെന്ന് പരിശോധിക്കണം എന്നും ജയശങ്കര്‍ വ്യക്തമാക്കി. അതേസമയം, തന്റെ സുഹൃത്ത് മോദിക്ക് യുഎസ് എയിഡ് കിട്ടിയെന്ന ട്രംപിന്റെ പ്രസ്താവനയില്‍ മോദി വിശദീകരണം നല്‍കണമെന്ന് കോണ്‍ഗ്രസും തിരിച്ചടിച്ചു. ഇന്ത്യയില്‍ പോളിങ് ശതമാനം ഉയര്‍ത്താനെന്ന പേരില്‍, തിരഞ്ഞെടുപ്പ് രംഗത്ത് ഇടപെടാന്‍ അമേരിക്ക 170 കോടി ചെലവാക്കിയെന്നാണ് ഡോണള്‍ഡ് ട്രംപ് ആവര്‍ത്തിച്ചത്. അമേരിക്കയില്‍ വോട്ടര്‍ പങ്കാളിത്തം ഉയര്‍ത്താന്‍ ഇത് പോലെ പണം ചെലവഴിക്കാത്തതെന്താണെന്ന് ട്രംപ് ചോദിച്ചു. യുഎസ് ഫണ്ട് വന്നത് ആശങ്കാജനകമെന്ന് വിദേശകാര്യ വക്താവ് പ്രതികരിച്ചെങ്കിലും അമേരിക്കയോട് ഇതിന്റെ വിശദാംശം ആവശ്യപ്പെടാന്‍ ഒരു സര്‍ക്കാര്‍ ഏജന്‍സിയും തയ്യാറായിട്ടില്ല.
യുഎസ് എയിഡ് വഴി ഇന്ത്യയിലെ തിരഞ്ഞെടുപ്പ് രംഗത്ത് ഇടപെടാന്‍ അമേരിക്ക ഫണ്ട് നല്‍കിയത് ഡോണള്‍ഡ് ട്രംപ് തന്നെ മുന്‍ ബൈഡന് ഭരണകൂടത്തിനെതിരെ ആയുധമാക്കുകയാണ്. ഇന്ത്യയിലെ സംഘടനകള്‍ക്ക് നല്‍കിയത് കൈക്കൂലിയാണെന്നും ഇതില്‍ ഒരു വിഹിതം തിരിച്ച് അമേരിക്കയില്‍ തന്നെ എത്തുന്നുണ്ടെന്നും ട്രംപ് ഇന്നലെ ആരോപിച്ചു. തുടര്‍ച്ചയായി മൂന്നാം ദിവസവും ഇക്കാര്യത്തെക്കുറിച്ച് സംസാരിച്ച ഡോണള്‍ഡ് ട്രംപ്, അമേരിക്കയിലെ വോട്ടിംഗ് ശതമാനത്തിന്റെ കാര്യത്തില്‍ ബൈഡന് താല്പര്യം ഇല്ലായിരുന്നോ എന്നാണ് ചോദിക്കുന്നത്.
ഇന്ത്യയ്ക്കല്ല ബംഗളാദേശിനാണ് ഈ 170 കോടി കിട്ടിയതെന്ന റിപ്പോര്‍ട്ട് കഴിഞ്ഞ ദിവസം മാധ്യമങ്ങള്‍ റിപ്പോര്‍ട്ട് ചെയ്തിരുന്നു. എന്നാല്‍ ഫണ്ട് സ്വീകരിച്ച കോണ്‍ഗ്രസ് അനുകൂല സംഘടനകളെ രക്ഷിക്കാനാണ് റിപ്പോര്‍ട്ടെന്നാണ് ബിജെപിയുടെ ആരോപണം. തിരഞ്ഞെടുപ്പ് രംഗത്തെ യുഎസ് ഇടപെടല്‍ ആശങ്കാജനകമെന്ന് വിദേശകാര്യ വക്താവ് രണ്‍ധീര്‍ ജയ്‌സ്വാള്‍ ഇന്നലെ പറഞ്ഞിരുന്നു. ബന്ധപ്പെട്ട വിഭാഗങ്ങള്‍ ഇതന്വേഷിക്കുന്നു എന്ന് വിദേശകാര്യമന്ത്രാലയം പറഞ്ഞെങ്കിലും ഏതെങ്കിലും അന്വേഷണ ഏജന്‍സി ഇക്കാര്യത്തില്‍ നടപടികള്‍ തുടങ്ങിയതായി വ്യക്തമല്ല.തുക ഏതൊക്കെ സംഘടനകള്‍ക്ക് കിട്ടി എന്നതിന്റെ വിശദാംശം അമേരിക്കയോട് ഇതുവരെ ഇന്ത്യ ഔദ്യോഗികമായി തേടിയിട്ടുമില്ല. ഈ സാഹചര്യത്തില്‍ സത്യം കണ്ടെത്താനല്ല മറിച്ച് വിഷയം രാഷ്ട്രീയ ആയുധമമാക്കുന്നതില്‍ മാത്രമാണ് ബിജെപിക്ക് താല്‍പര്യമെന്ന് കോണ്‍ഗ്രസ് കുറ്റപ്പെടുത്തി.
