ന്യൂഡല്‍ഹി: പാകിസ്താനില്‍ പാസഞ്ചര്‍ ട്രെയിന്‍ വിഘടനവാദി സംഘടനയായ ദി ബലൂച്ച് ലിബറേഷന്‍ ആര്‍മി ഹൈജാക്ക് ചെയ്തതിനു പിന്നാലെ, രാജ്യത്തെ അക്രമസംഭവങ്ങള്‍ക്ക് പിന്നില്‍ ന്യൂഡല്‍ഹിയാണെന്ന പാകിസ്താന്റെ ആരോപണങ്ങള്‍ തള്ളി ഇന്ത്യ. ഇസ്ലാമാബാദ് ഒരു ഭീകര കേന്ദ്രമാണെന്ന ഇന്ത്യയുടെ നിലപാട് ആവര്‍ത്തിച്ച ഇന്ത്യ, മറ്റുള്ളവരെ കുറ്റപ്പെടുത്തുന്നതിനുപകരം പാകിസ്താന്‍ ആദ്യം ആത്മപരിശോധന നടത്തണമെന്ന് ആഭ്യന്ത്രമ മന്ത്രാലയം പ്രസ്താവനയില്‍ ആവശ്യപ്പെട്ടു.
അടിസ്ഥാനമില്ലാത്ത ആരോപണങ്ങളെല്ലാം ഞങ്ങള്‍ ശക്തമായി തള്ളിക്കളയുന്നു. ആഗോള ഭീകരതയുടെ പ്രഭവകേന്ദ്രം എവിടെയാണെന്ന് ലോകത്തിന് മുഴുവന്‍ അറിയാം. സ്വന്തം ആഭ്യന്തര പ്രശ്‌നങ്ങളുടെയും പരാജയങ്ങളുടെയും ഉത്തരവാദിത്വം മറ്റുള്ളവരുടെമേല്‍ കെട്ടിവയ്ക്കുന്നതിനുപകരം പാകിസ്താന്‍ ആദ്യം ഉള്ളിലേക്ക് നോക്കണം, ആഭ്യന്തരമന്ത്രാലയം കുറിപ്പില്‍ പറയുന്നു.
ഇന്ത്യ ‘ഭീകരതയെ സ്പോണ്‍സര്‍ ചെയ്യുന്നു’ എന്നും അയല്‍രാജ്യങ്ങളെ അസ്ഥിരപ്പെടുത്താന്‍ ശ്രമിക്കുന്നെന്നും ഒരു മുതിര്‍ന്ന പാക് ഉദ്യോഗസ്ഥന്‍ ആരോപിച്ചതിന് പിന്നാലെയാണ് ഇന്ത്യയുടെ പ്രതികരണം.
പാകിസ്താനിലെ തെക്ക്- പടിഞ്ഞാറന്‍ ബലൂചിസ്താന്‍ പ്രവിശ്യയായ ക്വെറ്റയില്‍നിന്ന് പെഷവാറിലേക്ക് പോവുകയായിരുന്ന ജാഫര്‍ എക്‌സ്പ്രസ് കഴിഞ്ഞദിവസം വിഘടനവാദികള്‍ കൈയടക്കിയിരുന്നു. ഈ സംഭവത്തെ തുടര്‍ന്നാണ് ഇന്ത്യയ്ക്കെതിരെ ആരോപണം ഉയര്‍ന്നത്. 30 മണിക്കൂര്‍ നേരം നീണ്ട ട്രെയിന്‍ റാഞ്ചലില്‍ 21 ബന്ദികളും നാല് സുരക്ഷാ ഉദ്യോഗസ്ഥരും കൊല്ലപ്പെട്ടിരുന്നു.
അതേസമയം ട്രെയിന്‍ ആക്രമണം വിദേശത്ത് ആസൂത്രണം ചെയ്തതാണെന്നും ഇന്ത്യയെ നേരിട്ട് പ്രതിക്കൂട്ടില്‍ നിര്‍ത്തിയിട്ടില്ലെന്നും പാക് വിദേശകാര്യ ഓഫീസ് വക്താവ് ഷഫ്ഖത്ത് അലി ഖാന്‍ പറഞ്ഞു. ട്രെയിന്‍ ഉപരോധത്തിലുടനീളം ബിഎല്‍എ വിമതര്‍ അഫ്ഗാനിസ്താനിലുള്ള അവരുടെ കൂട്ടാളികളുമായി ബന്ധപ്പെട്ടിരുന്നുവെന്നും അദ്ദേഹം പറഞ്ഞു.
