ടെക്‌സസ്: അമേരിക്കന്‍ സംസ്ഥാനമായ ടെക്‌സസിനെ പിടിച്ചുലച്ച മിന്നല്‍ പ്രളയത്തില്‍ മരിച്ചവരുടെ എണ്ണം 100 കടന്നു. ഔദ്യോഗിക കണക്കുകള്‍ പ്രകാരം 104 പേരുടെ മരണം സ്ഥിരീകരിച്ചിട്ടുണ്ട്. ഇതില്‍ 84 മരണങ്ങളും കേര്‍ കൗണ്ടിയിലാണ് രേഖപ്പെടുത്തിയത്. മരിച്ചവരില്‍ 28 കുട്ടികളും ഉള്‍പ്പെടുന്നു എന്നത് ദുരന്തത്തിന്റെ വ്യാപ്തി വര്‍ധിപ്പിക്കുന്നു.
ഇപ്പോഴും 24 പേരെ കണ്ടെത്താനുണ്ട്, ഇതില്‍ ക്യാമ്പ് മിസ്റ്റിക്കിലെ 10 കുട്ടികളും ഒരു കൗണ്‍സലറും ഉള്‍പ്പെടുന്നു. കാണാതായവര്‍ക്കായുള്ള തിരച്ചില്‍ ഊര്‍ജ്ജിതമായി തുടരുകയാണ്. ടെക്‌സസിന്റെ മധ്യമേഖലയില്‍ ഇന്നും മഴയ്ക്ക് സാധ്യതയുണ്ടെന്നാണ് കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നല്‍കിയിരിക്കുന്നത്.
ദുരന്തത്തില്‍ മിനിറ്റുകള്‍ക്കകം ഭൂമി വെള്ളത്തിനടിയിലാകുന്ന ഞെട്ടിക്കുന്ന ദൃശ്യങ്ങളാണ് ടെക്‌സസില്‍ നിന്ന് പുറത്തുവരുന്നത്. ഗുവാഡലൂപ്പ് നദി 45 മിനിറ്റിനുള്ളില്‍ 26 അടിയിലധികം ഉയര്‍ന്നത് സ്ഥിതി അതീവ ഗുരുതരമാക്കി. പല പ്രദേശങ്ങളിലും ഫ്‌ലാഷ് ഫ്‌ലഡ് മുന്നറിയിപ്പുകള്‍ ഇപ്പോഴും നിലവിലുണ്ട്.
കെര്‍ കൗണ്ടിയിലെ ക്രിസ്ത്യന്‍ ക്യാമ്പില്‍ നിരവധി കുടുംബങ്ങള്‍ ട്രെയിലര്‍ വീടുകള്‍ക്കുള്ളില്‍ കുടുങ്ങുകയും ആളുകള്‍ വെള്ളത്തില്‍ ഒഴുകിപ്പോകുകയും ചെയ്തിരുന്നു. ഏകദേശം രണ്ട് ഡസനോളം ക്യാമ്പംഗങ്ങളെക്കുറിച്ച് ഇപ്പോഴും വിവരമില്ലെന്ന് അധികൃതര്‍ വ്യക്തമാക്കി. കാണാതായവരുടെ എണ്ണം ഇനിയും വര്‍ധിക്കാനാണ് സാധ്യതയെന്നും റിപ്പോര്‍ട്ടുകള്‍ സൂചിപ്പിക്കുന്നു.
