ന്യൂഡല്‍ഹി: യുക്രെയ്നില്‍ സൈനിക നീക്കം തുടരുന്നതിനിടെ റഷ്യന്‍ വിദേശകാര്യമന്ത്രി സെര്‍ജി ലാവ്റോവ് ഇന്ന് ഇന്ത്യയിലെത്തും.രണ്ടു ദിവസത്തെ സന്ദര്‍ശനത്തിനായാണ് ലാവ്റോവ് ഇന്ത്യയിലെത്തുന്നത്. യുക്രെയ്ന്‍ അധിനിവേശത്തിന് ശേഷം ആദ്യമായി ഇന്ത്യയിലെത്തുന്ന റഷ്യന്‍ നേതാവാണ് ലാവ്റോവ്.വിവിധ രാജ്യങ്ങള്‍ റഷ്യയ്ക്കുമേല്‍ ഉപരോധം ഏര്‍പ്പെടുത്തിയ സാഹചര്യത്തില്‍ ഇന്ത്യയുമായി വ്യാപാരബന്ധം കൂടുതല്‍ ശക്തമാക്കാനാണ് ലാവ്‌റോവിന്‍റെ സന്ദര്‍ശനത്തിലൂടെ ലക്ഷ്യമിടുന്നത്. വിദേശകാര്യമന്ത്രി എസ് ജയശങ്കര്‍, പ്രതിരോധ മന്ത്രി രാജ്നാഥ് സിങ് എന്നിവരുമായി യു.എസ് പ്രതിരോധ, വിദേശകാര്യ മന്ത്രിമാരാണ് കൂടിക്കാഴ്ച നടത്തുക.
ചൈനയിലെ സന്ദര്‍ശനത്തിനു ശേഷമാണ് ലാവ്റോവ് ഇന്ത്യയിലെത്തുന്നത്. ചൈനയിലെ വിദേശകാര്യമനത്രി വാങ് യീയുമായി ലാവ്റോവ് യുക്രെയ്ന്‍ പ്രശ്നം ചര്‍ച്ച ചെയ്തതിനുശേഷമാണ് ഇന്ത്യ സന്ദര്‍ശിക്കുന്നത്.റഷ്യ യുക്രെയ്നില്‍ സൈനിക നീക്കം ആരംഭിച്ചതിനെതിരെ ലോകരാജ്യങ്ങള്‍ രംഗത്തെത്തിയപ്പോള്‍ ഇന്ത്യ റഷ്യക്കെതിരെ വിമര്‍ശനം ഉന്നയിച്ചിരുന്നില്ല. ഐക്യരാഷ്ട്രസഭയില്‍ റഷ്യയെ തള്ളാത്ത നിലപാടാണ് ഇന്ത്യ സ്വീകരിച്ചത്.