ഓട്ടവ : ഇന്റർനാഷണൽ എക്സ്പീരിയൻസ് കാനഡയ്ക്ക് (ഐഇസി) കീഴിൽ ഓപ്പൺ വർക്ക് പെർമിറ്റിന് അപേക്ഷിക്കാൻ വർക്കിംഗ് ഹോളിഡേ വീസ, യംഗ് പ്രൊഫഷണലുകൾ, ഇന്റർനാഷണൽ കോ-ഓപ്പ് (ഇന്റേൺഷിപ്പ്) എന്നീ വിഭാഗങ്ങളിൽ നിന്നായി 2,519 അപേക്ഷകർക്ക് വർക്ക് പെർമിറ്റ് ഇൻവിറ്റേഷൻ നൽകി.
ഇതിൽ, ഏറ്റവും വലിയ IEC വിഭാഗമായ വർക്കിംഗ് ഹോളിഡേ വീസ നറുക്കെടുപ്പിൽ കഴിഞ്ഞ 2 ആഴ്ചയ്ക്കുള്ളിൽ ഓപ്പൺ വർക്ക് പെർമിറ്റിന് അപേക്ഷിക്കാൻ 2,281 ഉദ്യോഗാർത്ഥികൾക്ക് ഇൻവിറ്റേഷൻ നൽകിയതായി ഇമിഗ്രേഷൻ, റെഫ്യൂജീസ്, സിറ്റിസൺഷിപ്പ് കാനഡ (IRCC) അറിയിച്ചു.
ഇന്റർനാഷണൽ എക്സ്പീരിയൻസ് കാനഡയുടെ (IEC) വർക്കിംഗ് ഹോളിഡേ വിസ വിഭാഗത്തിന് കീഴിൽ യോഗ്യരായ 33 രാജ്യങ്ങളിൽ നിന്നുള്ള യുവാക്കൾക്ക് 2023 സീസണിൽ 14,833 സ്പോട്ടുകൾ ഇപ്പോഴും ലഭ്യമാണ്.
കൂടാതെ, ക്ലോസ്ഡ് വർക്ക് പെർമിറ്റിന് അപേക്ഷിക്കാന് 179 അപേക്ഷകർക്ക് യംഗ് പ്രൊഫഷണലുകൾ വിഭാഗത്തിൽ ഇൻവിറ്റേഷൻ നൽകിയിട്ടുണ്ട്. IEC യുടെ ഏറ്റവും ചെറിയ വിഭാഗമായ ഇന്റർനാഷണൽ കോ-ഓപ്പ് (ഇന്റേൺഷിപ്പ്) പ്രകാരം 59 ക്ലോസ്ഡ് വർക്ക് പെർമിറ്റ് ഇൻവിറ്റേഷൻ മാത്രമേ നൽകിയിട്ടുള്ളൂ.
IEC 2023 സീസൺ പ്രോസസ്സിംഗ് സമയം ഇപ്പോൾ 7 ആഴ്ച ആയി കുറഞ്ഞതായി ഇമിഗ്രേഷൻ, റെഫ്യൂജീസ്, സിറ്റിസൺഷിപ്പ് കാനഡയുടെ (IRCC) ഏറ്റവും പുതിയ പ്രോസസ്സിംഗ് അപ്ഡേറ്റ് സൂചിപ്പിക്കുന്നു.
വിവിധ രാജ്യങ്ങളിൽ നിന്നുള്ള യുവാക്കളെ കാനഡയിൽ താൽക്കാലികമായി താമസിക്കാനും ജോലി ചെയ്യാനും പ്രാപ്തരാക്കുന്ന പ്രോഗ്രാമാണ് ഇന്റർനാഷണൽ എക്സ്പീരിയൻസ് കാനഡ (ഐഇസി). IEC പ്രോഗ്രാമുകളിലൊന്ന് വിജയകരമായി പൂർത്തിയാക്കുന്ന വിദേശ പൗരന്മാർക്ക് ഒരു LMIA സമർപ്പിക്കാതെ തന്നെ കനേഡിയൻ വർക്ക് പെർമിറ്റിനായി അപേക്ഷിക്കാൻ സാധിക്കും.