ഫേസ്ബുക്ക്, ടിക് ടോക്ക്, ഇന്‍സ്റ്റാഗ്രാം, ട്വിറ്റര്‍ (എക്സ്), യൂട്യൂബ് എന്നിവയുള്‍പ്പെടെയുള്ള സോഷ്യല്‍ സൈറ്റുകള്‍ നിരോധിക്കാന്‍ നീക്കവുമായി പാക്കിസ്ഥാന്‍. രാജ്യത്തിനും സായുധ സേനയ്ക്കുമെതിരായ ‘ദുരുപയോഗം’ സാധ്യമായ പശ്ചാത്തലത്തില്‍ സോഷ്യല്‍ മീഡിയ സൈറ്റുകള്‍ നിരോധിക്കണമെന്ന് ആവശ്യപ്പെട്ട് സെനറ്റില്‍ പ്രമേയം അവതരിപ്പിച്ചിരുന്നു. മാര്‍ച്ച് 11 ന് സെനറ്ററായുള്ള കാലാവധി അവസാനിക്കാനിരിക്കെ പാക്കിസ്ഥാന്‍ പീപ്പിള്‍സ് പാര്‍ട്ടി (പിപിപി) സെനറ്റര്‍ ബഹ്റമന്ദ് താംഗിയാണ് പ്രമേയം അവതരിപ്പിച്ചത്.
‘പാക്കിസ്ഥാന്റെ സായുധ സേനയ്ക്കെതിരായ നിഷേധാത്മകവും ദുരുദ്ദേശ്യപരവുമായ പ്രചരണങ്ങളിലൂടെ’ രാജ്യത്തിന്റെ താല്‍പ്പര്യങ്ങള്‍ക്ക് വിരുദ്ധമായി സോഷ്യല്‍ മീഡിയ പ്ലാറ്റ്ഫോമുകള്‍ ഉപയോഗിക്കുന്നതിനെക്കുറിച്ച് ആശങ്കയുണ്ടെന്ന് താംഗി പറഞ്ഞു. വിവിധ വിഷയങ്ങളില്‍ വ്യാജവാര്‍ത്തകള്‍ പ്രചരിപ്പിക്കുന്നതിനും യുവതലമുറയെ കബളിപ്പിക്കുന്നതിനായി രാജ്യത്ത് വ്യാജനേതൃത്വം സൃഷ്ടിക്കുന്നതിനും പ്രോത്സാഹിപ്പിക്കുന്നതിനും ഈ പ്ലാറ്റ്ഫോമുകള്‍ നിക്ഷിപ്ത താല്‍പ്പര്യങ്ങള്‍ക്കായി ഉപയോഗിക്കുകയാണെന്നും പ്രമേയം വ്യക്തമാക്കി. ‘
വ്യക്തിയെയോ പാര്‍ട്ടിയെയോ പരാമര്‍ശിച്ചിട്ടില്ലെങ്കിലും, യുവാക്കളുടെ പിന്തുണ നേടിയെടുക്കാന്‍ സോഷ്യല്‍ മീഡിയ ഫലപ്രദമായി ഉപയോഗിച്ച ജയിലില്‍ കിടക്കുന്ന മുന്‍ പ്രധാനമന്ത്രി ഇമ്രാന്‍ ഖാനെയും അദ്ദേഹത്തിന്റെ പാര്‍ട്ടി പാകിസ്ഥാന്‍ തെഹ്രീകെ ഇന്‍സാഫിനെയും (പിടിഐ) കുറിച്ചാണ് പരാമര്‍ശം. 2023 മെയ് 9 ന് സൈനിക ഉദ്യോഗസ്ഥരുടെ ആഡംബര ജീവിതശൈലി കാണിക്കുന്ന സോഷ്യല്‍ മീഡിയയിലെ വീഡിയോ പോസ്റ്റുകള്‍ വലിയ വിമര്‍ശനം ഉയര്‍ത്തിയിരുന്നു.
