ഓട്ടവ : ടെറിട്ടറിയിലെ ആരോഗ്യമേഖലയിലെ പ്രതിസന്ധി പരിഹരിക്കുന്നതിനായി നൂനവൂട്ട് ഫെഡറൽ ഗവണ്മെന്റുമായി 36 ദശലക്ഷം ഡോളറിന്റെ ആരോഗ്യ കരാറിൽ ഒപ്പിട്ടു. നഴ്സുമാരെ റിക്രൂട്ട് ചെയ്യാനും നിലനിർത്താനും ഫണ്ട് വിനിയോഗിക്കും.
കൂടാതെ പ്രസവ-അഡിക്ഷൻ സേവനങ്ങൾ മെച്ചപ്പെടുത്താനും റിമോട്ട് കമ്മ്യൂണിറ്റികളിലെ ആരോഗ്യ സംരക്ഷണ ആവശ്യങ്ങൾ പരിശോധിക്കുന്നതിനും ഹെൽത്ത് കരാർ സഹായിക്കും. മൂന്ന് വർഷത്തെ പ്രോഗ്രാമിലേക്ക് ഫെഡറൽ ഗവൺമെൻ്റ് 23.6 ദശലക്ഷം ഡോളർ നൽകും. ബാക്കി തുക നൂനവൂട്ട് നൽകും. നൂനവൂട്ടിലെ ലോങ് ടേം കെയർ ഹോം അന്തേവാസികളുടെ പരിചരണം മെച്ചപ്പെടുത്തുന്നതിനും ഹോം കെയർ വിപുലീകരിക്കുന്നതിനും ഫെഡറൽ ഗവൺമെൻ്റ് 12 ദശലക്ഷം ഡോളർ കൂടി നൽകും.
ബ്രിട്ടിഷ് കൊളംബിയ, പ്രിൻസ് എഡ്വേഡ് ഐലൻഡ്, ആൽബർട്ട, നോവസ്കോഷ, ഒൻ്റാരിയോ എന്നീ പ്രവിശ്യകളും നോർത്ത് വെസ്റ്റ് ടെറിട്ടറിയും നിലവിൽ ഫെഡറൽ ഗവണ്മെന്റുമായി ആരോഗ്യകരാറിൽ ഒപ്പു വെച്ചിട്ടുണ്ട്.
