ഓട്ടവ : ഉയരുന്ന ജീവിതച്ചെലവ് കാരണം പ്രതിസന്ധിയിലായ ജനങ്ങളെ സഹായിക്കുന്നതിന് കാനഡയിലെ സർക്കാർ നിരവധി ക്രെഡിറ്റുകളും റിബേറ്റ് പേയ്മെന്റുകളും നൽകുന്നുണ്ട്. മിക്ക കനേഡിയൻ പൗരന്മാരും അടുത്ത പേയ്മെന്റ് തീയതികൾക്കായി കാത്തിരിക്കുകയാണ്. മുൻ വർഷത്തെ നികുതി അടിസ്ഥാനമാക്കി വാർഷികാടിസ്ഥാനത്തിൽ ജൂലൈയിൽ എല്ലാ ആനുകൂല്യ പേയ്മെൻ്റുകളും CRA വീണ്ടും കണക്കാക്കുന്നതിനാൽ എല്ലാ ആനുകൂല്യങ്ങളുടെയും തുക വർധിക്കും.
ഈ ആനുകൂല്യങ്ങളിൽ GST/HST ക്രെഡിറ്റ് പോലുള്ള നികുതി ക്രെഡിറ്റുകൾ മുതൽ കാനഡ ചൈൽഡ് ബെനിഫിറ്റ് വഴി കുട്ടികളെ വളർത്തുന്നതിനുള്ള സഹായം, കാനഡ വർക്കേഴ്സ് ബെനിഫിറ്റ്, കാനഡ ഡെന്റൽ ബെനിഫിറ്റ്, കാനഡ ഡെന്റൽ ബെനിഫിറ്റ് എന്നിവയും പരിസ്ഥിതി ചെലവുകൾക്കുള്ള സഹായവും വരെയുണ്ട്. ഈ ആനുകൂല്യ പേയ്മെൻ്റുകൾ ലഭിക്കുന്നതോടെ കാനഡക്കാർക്ക് അവരുടെ സാമ്പത്തിക സ്ഥിതി മെച്ചപ്പെടുത്തുന്നതിന് സഹായിക്കും.
ചെലവുകൾ കൈകാര്യം ചെയ്യുന്നത് കൂടുതൽ വെല്ലുവിളിയായി മാറിയിരിക്കുന്ന ഇക്കാലത്ത് പൗരന്മാരെ സഹായിക്കുന്നതിനായി ജൂലൈയിൽ കാനഡ റവന്യൂ ഏജൻസി (CRA) നാല് പേയ്മെൻ്റുകൾ വിതരണം ചെയ്യും. താൽക്കാലിക താമസക്കാർ – വർക്ക് പെർമിറ്റ് ഉടമകളും രാജ്യാന്തര വിദ്യാർത്ഥികളും ഉൾപ്പെടെ, യോഗ്യതയുള്ള നികുതിദായകർക്ക് ഈ CRA ആനുകൂല്യ പേയ്മെൻ്റുകൾ ലഭിക്കും.
പുതിയ തുകയും വരാനിരിക്കുന്ന പേയ്മെൻ്റ് തീയതിയും ഉൾപ്പെടെ 4 CRA ആനുകൂല്യ പേയ്മെൻ്റുകൾ ചുവടെ ചേർക്കുന്നു :
കാനഡ ചൈൽഡ് ബെനിഫിറ്റ് (CCB)
കാനഡ ചൈൽഡ് ബെനിഫിറ്റ് (CCB) എന്നത് കുട്ടികളെ വളർത്തുന്നതിനുള്ള ചെലവുകൾക്കായി കുടുംബങ്ങളെ സഹായിക്കുന്നതിന് രൂപകൽപ്പന ചെയ്തിട്ടുള്ള നികുതി രഹിത പ്രതിമാസ പേയ്മെൻ്റാണ്. 2022-ലെ അപേക്ഷകരുടെ വരുമാനവും കുട്ടികളുടെ പ്രായവും അനുസരിച്ചായിരിക്കും തുക അനുവദിക്കുക. എല്ലാ മാസവും 20-ാം തീയതിയാണ് തുക നൽകുക. ജൂലൈ 19-നാണ് ഈ മാസത്തെ കാനഡ ചൈൽഡ് ബെനിഫിറ്റ് വിതരണം ചെയ്യുക. ഓഗസ്റ്റ് 20, സെപ്റ്റംബർ 20, ഒക്ടോബർ 18, നവംബർ 20, ഡിസംബർ 13 തീയതികളിലാണ് 2024-ലെ അടുത്ത CCB പേയ്മെൻ്റ് വിതരണം ചെയ്യുന്നത്.
6 വയസ്സിന് താഴെയുള്ള ഓരോ കുട്ടിക്കും, ജൂലൈയിൽ പ്രതിമാസം 648.91 ഡോളർ (പ്രതിവർഷം പരമാവധി 7786.92 ഡോളർ) ലഭിക്കും. 6 മുതൽ 17 വയസ്സ് വരെ പ്രായമുള്ള ഓരോ കുട്ടിക്കും, ജൂലൈയിൽ പ്രതിമാസം 547.5 ഡോളർ ആയിരിക്കും ലഭിക്കുക. ഇത് പ്രതിവർഷം പരമാവധി 6,570 ഡോളർ ആയിരിക്കും.
GST/HST പേയ്മെൻ്റ്
ചരക്ക് സേവന നികുതി/ഹാർമോണൈസ്ഡ് സെയിൽസ് ടാക്സ് (GST/HST) ക്രെഡിറ്റ് എന്നത് കുറഞ്ഞതും മിതമായതുമായ വരുമാനമുള്ള വ്യക്തികൾക്കും കുടുംബങ്ങൾക്കും നികുതി ഭാരം കുറയ്ക്കാൻ ലക്ഷ്യമിട്ടുള്ള നികുതി രഹിത ത്രൈമാസ പേയ്മെൻ്റാണ്. ജൂലൈ മുതൽ, GST/HST പേയ്മെൻ്റ് തുക വർധിക്കും. അവിവാഹിതർക്ക് 519 ഡോളർ, വിവാഹിതരായ ദമ്പതികൾക്ക് 680 ഡോളർ, 19 വയസ്സിന് താഴെയുള്ള ഓരോ കുട്ടിക്കും 179 ഡോളറും ജൂലൈ 5-ന് ലഭിക്കും. 2023-ൽ ഫയൽ ചെയ്ത നികുതിയെ അടിസ്ഥാനമാക്കിയാണ് നിലവിലെ തുക കണക്കാക്കിയിരിക്കുന്നത്. ഒക്ടോബർ 4, 2025 ജനുവരി 3, 2025
ഏപ്രിൽ 4 എന്നിവയാണ് അടുത്ത GST പേയ്മെൻ്റ് തീയതികൾ.
അഡ്വാൻസ്ഡ് കാനഡ വർക്കേഴ്സ് ബെനിഫിറ്റ് (ACWB)
അഡ്വാൻസ്ഡ് കാനഡ വർക്കേഴ്സ് ബെനിഫിറ്റ് (ACWB) എന്നത് താഴ്ന്ന വരുമാനക്കാരായ വ്യക്തികളെയും കുടുംബങ്ങളെയും സഹായിക്കുക എന്ന ലക്ഷ്യത്തോടെയുള്ള റീഫണ്ട് ചെയ്യാവുന്ന നികുതി ആനുകൂല്യമാണ്. ഡിസംബർ 31-ന് 19 വയസോ അതിൽ കൂടുതലോ പ്രായമുള്ള ഒരു പങ്കാളിയോടോ പൊതു നിയമ പങ്കാളിയോടോ കുട്ടിയോടോ ഒപ്പം ജീവിക്കുന്നവർക്ക് അഡ്വാൻസ്ഡ് കാനഡ വർക്കേഴ്സ് ബെനിഫിറ്റിന് അർഹരായിരിക്കും. കൂടാതെ അപേക്ഷകരുടെ പ്രവിശ്യ-പ്രദേശത്തെ കുറഞ്ഞ വരുമാനത്തിൽ ജോലി ചെയ്യുന്നവരും ACWB-യ്ക്ക് യോഗ്യരായിരിക്കും. ജൂലൈ 12, ഒക്ടോബർ 11, 2025 ജനുവരി 10 എന്നിവയാണ് അടുത്ത ACWB പേയ്മെൻ്റ് തീയതികൾ.
അവിവാഹിതരായ കനേഡിയൻ പൗരന്മാരുടെ വാർഷിക വരുമാനം 24,975 ഡോളർ അല്ലെങ്കിൽ അതിൽ കുറവാണെങ്കിൽ മൂന്ന് ത്രൈമാസ പേയ്മെന്റുകളായി 1,518 ഡോളർ വരെ ലഭിക്കും. വരുമാനം കൂടുന്നതിനനുസരിച്ച് ഈ തുക കുറയും. വാർഷിക വരുമാനം 35,095 ഡോളർ അല്ലെങ്കിൽ അതിൽ കൂടുതലാണെങ്കിൽ ആനുകൂല്യം ലഭിക്കില്ല.
കുടുംബങ്ങൾക്ക് അവരുടെ വാർഷിക വരുമാനം 28,494 അല്ലെങ്കിൽ അതിൽ കുറവാണെങ്കിൽ മൊത്തം 2,616 ഡോളർ വരെ ലഭിച്ചേക്കാം. എന്നാൽ, വരുമാനം കൂടുന്നതിനനുസരിച്ച് ഈ തുക കുറയുകയും വാർഷിക വരുമാനം 45,934 ഡോളറോ അതിൽ കൂടുതലോ ആണെങ്കിൽ ഒരു തുകയും നൽകില്ല.
കാനഡ കാർബൺ റിബേറ്റ് (CCR)
മുമ്പ് ക്ലൈമറ്റ് ആക്ഷൻ ഇൻസെൻ്റീവ് പേയ്മെൻ്റ് (CAIP) എന്നറിയപ്പെട്ടിരുന്ന കാനഡ കാർബൺ റിബേറ്റ് (CCR) വാർഷിക വരുമാനം കണക്കിലെടുക്കാതെ, ഫെഡറൽ മലിനീകരണ വിലനിർണ്ണയവുമായി ബന്ധപ്പെട്ട ചെലവുകൾ നികത്താൻ സഹായിക്കുന്നതിന് രൂപകൽപ്പന ചെയ്തിട്ടുള്ളതാണ്. ആൽബർട്ട, സസ്കാച്വാൻ, മാനിറ്റോബ, ഒൻ്റാരിയോ, ന്യൂഫിൻലൻഡ് ആൻഡ് ലാബ്രഡോർ, നോവസ്കോഷ, പ്രിൻസ് എഡ്വേഡ് ഐലൻഡ് എന്നീ പ്രവിശ്യാവാസികൾക്ക് കാനഡ കാർബൺ റിബേറ്റിന് അർഹതയുണ്ട്. മൂന്നു മാസത്തിലൊരിക്കലാണ് കാനഡ കാർബൺ റിബേറ്റ് വിതരണം ചെയ്യുക. അടുത്ത CCR അല്ലെങ്കിൽ CAIP പേയ്മെൻ്റ് തീയതികൾ ജൂലൈ 15, ഒക്ടോബർ 15, 2025 ജനുവരി 15, 2025 ഏപ്രിൽ 14 എന്നിവയാണ്.