ഓട്ടവ : പ്രതീക്ഷിച്ചതിനും മുന്നേ കാനഡ ഫെഡറൽ തിരഞ്ഞെടുപ്പിലേക്ക് കടക്കുമോ എന്ന് അടുത്തയാഴ്ച അറിയാം. സാങ്കേതികമായി അടുത്ത വർഷം ഒക്ടോബറിലാണ് ഫെഡറൽ തിരഞ്ഞെടുപ്പ് നടക്കേണ്ടത്. എന്നാൽ, ന്യൂ ഡെമോക്രാറ്റ് പാർട്ടി, ജസ്റ്റിൻ ട്രൂഡോയുടെ ന്യൂനപക്ഷ ലിബറൽ ഗവൺമെൻ്റുമായുള്ള കരാർ പിൻവലിച്ചതിന് ശേഷമുള്ള ആദ്യ അഗ്നിപരീക്ഷയായി അടുത്ത ആഴ്ച അവിശ്വാസ പ്രമേയത്തെ നേരിടേണ്ടി വരും.
ന്യൂനപക്ഷ ലിബറൽ ഗവൺമെൻ്റിനെതിരെ അടുത്ത ചൊവ്വാഴ്ച അവിശ്വാസ പ്രമേയം അവതരിപ്പിക്കാൻ കൺസർവേറ്റീവ് പാർട്ടി ആസൂത്രണം ചെയ്തിട്ടുണ്ടെന്ന് ഗവൺമെൻ്റ് ഹൗസ് ലീഡറുടെ ഓഫിസ് അറിയിച്ചതായി റിപ്പോർട്ടുകൾ സൂചിപ്പിക്കുന്നു. അവിശ്വാസ പ്രമേയത്തിന്മേൽ വോട്ടെടുപ്പ് സെപ്റ്റംബർ 25 ബുധനാഴ്ച നടക്കും.
അതേസമയം 154 എംപിമാരുള്ള പ്രധാനമന്ത്രി ജസ്റ്റിൻ ട്രൂഡോയുടെ ലിബറൽ ഗവൺമെൻ്റിനെ അവിശ്വാസ വോട്ടെടുപ്പിൽ അട്ടിമറിക്കുന്നതിന് 119 അംഗങ്ങളുള്ള കൺസർവേറ്റീവ് പാർട്ടിക്ക് എൻഡിപിയുടെ 25 അംഗങ്ങളുടെ മാത്രം പിന്തുണ മതിയാകില്ല. അതിനാൽ ഇപ്പോൾ 33 എംപിമാരുള്ള ബ്ലോക്ക് കെബെക്കോയിസിൻ്റെ പിന്തുണ കൂടി ഉറപ്പാക്കാനായിരിക്കും കൺസർവേറ്റീവ് പാർട്ടിയുടെ ശ്രമം. എന്നാൽ, കെബെക്കിലെ ലാസല്ലെ-എമാർഡ്-വേർഡൂൺ ഫെഡറൽ ഉപതിരഞ്ഞെടുപ്പിൽ സീറ്റ് പിടിച്ചെടുത്തെങ്കിലും ലിബറൽ പാർട്ടിയെ പിണക്കാൻ താല്പര്യമില്ലെന്ന് ബ്ലോക്ക് കെബെക്കോയിസ് സൂചിപ്പിച്ചിട്ടുണ്ട്. ഈ പിന്തുണയ്ക്ക് പകരമായി കെബെക്കിന് നേട്ടമുണ്ടാക്കാൻ നടപടിയെടുക്കാൻ സർക്കാരിനെ നിർബന്ധിക്കാൻ ശ്രമിക്കാനും പാർട്ടി ആഗ്രഹിക്കുന്നു. ഓരോ സാഹചര്യത്തിലും സർക്കാരിനെ പിന്തുണയ്‌ക്കണോ വേണ്ടയോ എന്ന് അപ്പോൾ തീരുമാനിക്കുമെന്നാണ് എൻഡിപിയുടെ നിലപാട്.
