കാന്‍ബെറ: ഇന്‍ വിട്രോ ഫെര്‍ട്ടിലൈസേഷന്‍ (IVF) വഴി ലോകത്തിലെ ആദ്യത്തെ കാംഗരു ഭ്രൂണം നിര്‍മ്മിച്ച് ഓസ്ട്രേലിയന്‍ ശാസ്ത്രജ്ഞര്‍, ഇത് ജീവജാലങ്ങളെ വംശനാശത്തില്‍ നിന്ന് രക്ഷിക്കാന്‍ സഹായിക്കുമെന്ന് അവര്‍ പറയുന്നു.
ഇസ്റ്റേണ്‍ ഗ്രേ കാംഗരുക്കളുടെ മാതൃകകള്‍ ഉപയോഗിച്ച്, ഗവേഷകര്‍ ഒരു ബീജകോശം ഒരു അണ്ഡത്തിലേക്ക് വിജയകരമായി കുത്തിവച്ചു, എന്നാല്‍ കാംഗരു കുഞ്ഞിന് ജന്മം നല്‍കുന്നതിന് കൂടുതല്‍ അധ്വാനവും ‘സാങ്കേതിക പുരോഗതിയും’ ആവശ്യമാണെന്ന് അവര്‍ പറഞ്ഞു. പുതിയ കണ്ടുപിടുത്തം വംശനാശഭീഷണി നേരിടുന്ന ജീവികളായ കോല, ടാസ്മാനിയന്‍ ഡെവിള്‍, വൊംബാറ്റ്, ലീഡ്ബീറ്റേഴ്‌സ് പോസം എന്നിവയുടെ ജനിതക വൈവിധ്യം മെച്ചപ്പെടുത്തുന്നതിനുള്ള ശ്രമങ്ങളെ സഹായിക്കുമെന്ന് ഗവേഷകനായ ആന്‍ഡ്രസ് ഗാംബിനി പറഞ്ഞു.
ഓസ്ട്രേലിയയിലാണ് ഏറ്റവും വലിയ ഇനം മാര്‍സുപിയല്‍ സസ്തനികള്‍ ഉള്ളത്, എന്നാല്‍ ഈ സസ്തനികളുടെ വംശനാശത്തിന്റെ ഏറ്റവും ഉയര്‍ന്ന നിരക്കും ഇവിടെയാണ്.
ഇന്‍ട്രാസൈറ്റോപ്ലാസ്മിക് ബീജ കുത്തിവയ്പ്പ് എന്നറിയപ്പെടുന്ന ഒരു രീതി ഉപയോഗിച്ച് ഭ്രൂണങ്ങള്‍ സൃഷ്ടിക്കുന്നതിന് മുമ്പ് ലബോറട്ടറി ക്രമീകരണത്തില്‍ കാംഗരു അണ്ഡങ്ങളുടെയും ബീജങ്ങളുടെയും വളര്‍ച്ചയെക്കുറിച്ച് ക്വീന്‍സ്ലാന്‍ഡ് സര്‍വകലാശാല പരീക്ഷണം നടത്തി.
മനുഷ്യരിലും ചില വളര്‍ത്തുമൃഗങ്ങളിലും ഉപയോഗിച്ചിരുന്ന ഈ വിദ്യ, ചത്തുപോയ ഈസ്റ്റേണ്‍ ഗ്രേ കാംഗരുക്കളില്‍ പരീക്ഷിച്ചു. വംശനാശഭീഷണി ഇല്ലാത്തതിനാലും ഉയര്‍ന്ന ജനസംഖ്യയുള്ളതിനാലുമാണ് ഈ ഇനത്തെ തിരഞ്ഞെടുത്തത്.കാംഗരുക്കളുടെ അണ്ഡങ്ങളും ബീജങ്ങളും ശേഖരിക്കുന്നതിനും സംസ്‌കരിക്കുന്നതിനും സംരക്ഷിക്കുന്നതിനുമുള്ള സാങ്കേതിക വിദ്യകള്‍ ഞങ്ങള്‍ ഇപ്പോള്‍ പരിഷ്‌ക്കരിക്കുകയാണെന്ന് ഡോ ഗാംബിനി പറഞ്ഞു.
ലോകമെമ്പാടുമുള്ള വംശനാശഭീഷണി നേരിടുന്ന ജീവികളെ സംരക്ഷിക്കുന്നതിനുള്ള മാര്‍ഗമായി IVF നെ കണക്കാക്കുന്നു.കഴിഞ്ഞ വര്‍ഷം, കാണ്ടാമൃഗത്തിന്റെ ഭ്രൂണം വാടക ഗര്‍ഭപാത്രത്തിലേക്ക് വിജയകരമായി മാറ്റി.അങ്ങനെ ലോകത്തിലെ ആദ്യത്തെ IVF കാണ്ടാമൃഗം ജനിച്ചു.2018 ല്‍, ലോകത്തിലെ ആദ്യത്തെ കഴുത ഭ്രൂണം സൃഷ്ടിക്കുന്നതിനും IVF ഉപയോഗിച്ചു.
