മെലിറ്റോപോള്‍ നഗരത്തിന്റെ മേയറെ റഷ്യന്‍സൈന്യം തട്ടിക്കൊണ്ടുപോയെന്ന് യുക്രൈന്‍

കീവ്: മെലിറ്റോപോള്‍ നഗരത്തിന്റെ മേയറെ റഷ്യന്‍സൈന്യം തട്ടിക്കൊണ്ടുപോയെന്ന് യുക്രൈന്‍. മേയര്‍ ഇവാന്‍ ഫെഡൊറോവിനെ വെള്ളിയാഴ്ച റഷ്യന്‍സൈന്യം തട്ടിക്കൊണ്ടുപോയെന്ന് തങ്ങളുടെ ഔദ്യോഗിക ട്വിറ്റര്‍ അക്കൗണ്ടിലൂടെയാണ് യുക്രൈന്‍ പാര്‍ലമെന്റ് അറിയിച്ചത്. യുക്രൈന്റെ തെക്കുഭാഗത്തുള്ള നഗരമാണ് മെലിറ്റോപോള്‍.
പത്തുപേരുള്‍പ്പെട്ട റഷ്യന്‍സംഘമാണ് ഫെഡൊറോവിനെ തട്ടിക്കൊണ്ടുപോയതെന്നും നഗരത്തിലെ രക്ഷാകേന്ദ്രത്തില്‍, വിതരണത്തകരാറുമായി ബന്ധപ്പെട്ട പ്രശ്‌നങ്ങള്‍ പരിഹരിക്കുന്നതിനിടെ ആയിരുന്നു സംഭവമെന്നും യുക്രൈന്‍ കൂട്ടിച്ചേര്‍ത്തു. വെള്ളിയാഴ്ച, വൈകിട്ട് പുറത്തുവിട്ട വീഡിയോയിലൂടെ യുക്രൈന്‍ പ്രസിഡന്റ് സെലെന്‍സ്‌കിയും തട്ടിക്കൊണ്ടുപോകല്‍ സ്ഥിരീകരിച്ചു.
യുദ്ധം ആരംഭിച്ചതിനു പിന്നാലെ റഷ്യന്‍ സൈന്യത്തിന്റെ നിയന്ത്രണത്തിലാണ് മെലിറ്റോപോള്‍ നഗരം. കുറച്ചുദിവസം മുന്‍പ് റഷ്യക്കെതിരെയുള്ള പ്രതിഷേധറാലിയില്‍ പങ്കെടുത്ത ഒരാളെയും റീജിയണല്‍ കൗണ്‍സിലിലെ ഒരംഗത്തെയും റഷ്യന്‍സൈന്യം തട്ടിക്കൊണ്ടുപോയിരുന്നു. പിന്നീട് ഇവരെ വിട്ടയക്കുകയും ചെയ്തിരുന്നു.