തിരുവനന്തപുരം : സംസ്ഥാനത്ത് ആറ് ജില്ലകളിൽ ചൂട് കൂടുമെന്ന മുന്നറിയിപ്പുമായി കാലാവസ്ഥാ വകുപ്പ്. കൊല്ലം, ആലപ്പുഴ, കോട്ടയം, തൃശൂർ, കോഴിക്കോട്, കണ്ണൂർ എന്നീ ആറ് ജില്ലകളിൽ വരും ദിവസങ്ങളിൽ ചൂട് കനക്കുമെന്നാണ് മുന്നറിയിപ്പ്. സംസ്ഥാനത്ത് ഏറ്റവുധികം ചൂട് രേഖപ്പെടുത്തുന്ന കോട്ടയത്ത് തുടർന്നുള്ള ദിവസങ്ങളിലും ചൂട് ശക്തമാകുമെന്നാണ് മുന്നറിയിപ്പ്.
ചൂട് കൂടുമെന്ന മുന്നറിയിപ്പുള്ള ആറ് ജില്ലകളിലും താപനില മൂന്ന് ഡിഗ്രിവരെ ഉയരും. സംസ്ഥാനത്ത് ചൂട് വർധിച്ചതോടെ സർക്കാരും ആരോഗ്യവകുപ്പും ജാഗ്രതാ നിർദേശം നൽകിയിട്ടുണ്ട്. പകൽ 12 മണി മുതൽ മൂന്ന് മണിവരെ പുറം സ്ഥലങ്ങളിൽ ജോലി ചെയ്യരുതെന്നാണ് നിർദേശം. ചൂട് നേരിട്ട് ഏൽക്കുന്ന സാഹചര്യം ഒഴിവാക്കണമെന്ന നിർദേശവും നൽകിയിട്ടുണ്ട്. ചൂട് വർധിച്ചതോടെ സൂര്യാഘാതം പോലെയുള്ള അപകടങ്ങൾക്ക് സാധ്യതയുണ്ട്.
മാര്ച്ച് രണ്ടിന് കോട്ടയത്ത് രാജ്യത്തെ ഏറ്റവും ഉയര്ന്ന താപനില രേഖപ്പെടുത്തിയിരുന്നു. വേനൽ മഴ ലഭിച്ചില്ലെങ്കിൽ സംസ്ഥാനത്ത് ചൂട് കൂടാനുള്ള സാഹചര്യമുണ്ട്. വരും ദിവസങ്ങളിൽ വേനൽ മഴയ്ക്കുള്ള സാധ്യത നിലവിലുണ്ടെന്നാണ് കാലാവസ്ഥ വകുപ്പ് നൽകുന്ന മുന്നറിയിപ്പ്. മാർച്ച് 5 മുതൽ 7വരെ കേരളത്തിൽ ഒറ്റപ്പെട്ടയിടങ്ങളിൽ ഇടിമിന്നലോട് കൂടിയ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചെങ്കിലും കാര്യമായ മഴ ലഭിച്ചില്ല.
മുൻ വർഷങ്ങളിൽ സംസ്ഥാനത്ത് ഏറ്റവുമധികം ചൂട് രേഖപ്പെടുത്തിയിരുന്നത് പാലക്കാട് ജില്ലയിലാണ്. എന്നാല് ഇത്തവണ പാലക്കാട് ജില്ലയിലേക്കാള് കൂടുതല് ചൂടാണ് കോട്ടയം ജില്ലയിൽ രേഖപ്പെടുത്തുന്നത്. പകല് സമയത്ത് 37 ഡിഗ്രി സെല്ഷ്യസിന് മുകളിലാണ് കോട്ടയത്തെ താപനില എന്നാണ് റിപ്പോർട്ടുകൾ വ്യക്തമാക്കുന്നത്. പുതിയ മുന്നറിയിപ്പ് പുറത്തുവന്നതോടെ കോട്ടയത്തെ ചൂട് ഇനിയും ഉയരുമെന്ന് വ്യക്തമായി.