കീവ് : റഷ്യൻ അധിനിവേശത്തിനിടെ യുക്രൈൻ ജനതയുടെ സഹായത്തിനായി കീവിൽ തുടർന്ന സാമൂഹ്യപ്രവർത്തക വെടിയേറ്റ് മരിച്ചു. മെഡിക്കൽ പ്രൊഫഷണലായ വലേറിയ മക്സെറ്റ്സ്ക എന്ന 31കാരിയാണ് കൊല്ലപ്പെട്ടത്. ഇവർക്കൊപ്പം വാഹനത്തിലുണ്ടായിരുന്ന അമ്മയെയും ഡ്രൈവറെയും കാറിൽ മരിച്ച നിലയിൽ കണ്ടെത്തി.
യുക്രൈൻ തലസ്ഥാനമായ കീവിന് പുറത്തുള്ള നഗരത്തിൽ നിന്നും മാറി പടിഞ്ഞാറൻ അതിർത്തിയിൽ വെച്ചാണ് മെഡിക്കൽ പ്രൊഫഷണൽ കൂടിയായ വലേറിയ്ക്ക് വെടിയേറ്റതെന്ന് ഡെയ്ലി മെയിൽ റിപ്പോർട്ട് ചെയ്തു. ഡൊനെറ്റ്സ്കിൽ ജനിച്ചു വളർന്ന ഇവർ യുദ്ധം ആരംഭിച്ചതോടെ ജനങ്ങളെ സഹായിക്കുകയെന്ന ലക്ഷ്യത്തോടെ ഏറ്റുമുട്ടൽ രൂക്ഷമായ കീവിലേക്ക് എത്തുകയായിരുന്നു. യുദ്ധം ആരംഭിച്ചതു മുതൽ കീവ് കേന്ദ്രമാക്കി ദിവസങ്ങളോളം പ്രവർത്തിച്ചു. പ്രദേശവാസികൾക്കും പരിക്കേറ്റവർക്കും സഹായങ്ങൾ നൽകി.
ഒപ്പമുണ്ടായിരുന്നവരും പരിചയക്കാരും കീവിൽ നിന്നും രക്ഷപ്പെട്ടപ്പോഴാണ് പ്രദേശവാസികളെ സഹായിക്കുന്നതിനായി വലേറിയ മക്സെറ്റ്സ്ക യുദ്ധമുഖത്ത് തുടർന്നത്. ഇതിനിടെ രോഗബാധിതയായ അമ്മയുടെ ആരോഗ്യനില മോശമായി. അമ്മയ്ക്ക് ആവശ്യമായ മരുന്ന് ഉൾപ്പെടെയുള്ള വസ്തുക്കൾ ലഭ്യമാകാതെ വന്നതോടെ രാജ്യം വിടാൻ തീരുമാനിക്കുകയായിരുന്നു.
അമ്മയുമൊത്ത് യുക്രൈൻ്റെ പടിഞ്ഞാറൻ അതിർത്തിയിലേക്ക് യാത്ര ചെയ്യുന്നതിനിടെ വാഹനത്തിന് നേർക്ക് വെടിവെപ്പ് ഉണ്ടാകുകായിരുന്നു. വലേറിയയും അമ്മയും കാറിൻ്റെ ഡ്രൈവറും കൊല്ലപ്പെട്ടുവെന്ന് യുണൈറ്റഡ് സ്റ്റേറ്റ്സ് ഏജൻസി ഫോർ ഇന്റർനാഷണൽ ഡെവലപ്മെന്റുമായി (യു.എസ്.എ.ഐ.ഡി) സ്ഥിരീകരിച്ചു.
യു.എസ്.എ.ഐ.ഡിയുമായി ചേർന്നാണ് വലേറിയ പ്രവർത്തിച്ചിരുന്നത്. “റഷ്യൻ അധിനിവേശം ആരംഭിച്ചപ്പോൾ എല്ലാവരെയും പോലെ വലേറിയ്ക്കും പ്രദേശത്ത് നിന്നും രക്ഷപ്പെടാമായിരുന്നു. എന്നാൽ ജനങ്ങളെ സഹായിക്കാൻ അവർ ഇവിടെ തുടരുകയായിരുന്നു. വലേറിയുടെ മരണത്തിൽ വേദനയുണ്ടെങ്കിലും അവരെക്കുറിച്ച് അഭിമാനമുണ്ട്, ധീരയായ യുവതിയാണ് വലേറിയ” – എന്ന് യു.എസ്.എ.ഐ.ഡി അഡ്മിനിസ്ട്രേറ്റർ പറഞ്ഞു.
റഷ്യൻ ആക്രമണം ആരംഭിച്ച ഫെബ്രുവരി 24 മുതൽ ഇതുവരെ യുക്രൈനിൽ ആയിരക്കണക്കിനാളുകളാണ് കൊല്ലപ്പെട്ടത്. ലക്ഷക്കണക്കിനാളുകൾ പലയാനം ചെയ്തു. പോളണ്ട്, ഹംഗറി, സ്ലൊവാക്യ, മോൾഡോവ, റൊമാനിയ, ബെലറൂസ് എന്നീ രാജ്യങ്ങളിലേക്കാണ് അഭയാർഥികൾ കൂട്ടമായി എത്തുന്നത്. ഏറ്റവുമധികം ആളുകൾ എത്തിയത് പോളണ്ടിലേക്കാണ്.