കനേഡിയൻമാരുടെ മനസറിഞ്ഞ് പുതിയ സർവേ; ജസ്റ്റിൻ ട്രൂഡോയും പിയറെ പൊലിവറെയും ഒപ്പത്തിനൊപ്പം

പുതിയ പ്രധാനമന്ത്രി പദത്തിന് അവകാശിയാരെന്ന ചോദ്യം ചോദിച്ചാൽ എന്തുമറുപടിയാകും കാനഡയിലെ ജനങ്ങൾ പറയുന്നതെന്നറിയാൻ ചെറിയൊരു ആകാംഷയെങ്കിലും എല്ലാവർക്കും കാണും. നാനോസ് റിസർച്ച് നടത്തിയ പുതിയ സർവേയുടെ ഉദ്ദേശ്യവും ഇതുതന്നെയായിരുന്നു. സർവേ പ്രകാരം 30 ശതമാനം കാനഡയിലെ ജനങ്ങളും ഇഷ്ട പ്രധാനമന്ത്രി കൺസർവേറ്റീവ് പാർട്ടി നേതാവാണെന്നാണ് വിധിയെഴുതിയത്. അതേസമയം 29.8 ശതമാനം പേർ പിന്തുണച്ച ട്രൂഡോ ഒട്ടും പിന്നിലല്ല.

എല്ലാ ആഴ്ചയും ആളുകളെ പങ്കെടുപ്പിച്ച് കൊണ്ട് ഇത്തരം സർവേകൾ നടക്കാറുണ്ട്. കഴിഞ്ഞ നാലാഴ്‌ചയ്‌ക്കുള്ളിൽ, കൺസർവേറ്റീവ് നേതാവിനെ പ്രധാനമന്ത്രിയായി അനുകൂലിക്കുന്ന കനേഡിയൻമാരുടെ ശതമാനം 11.6 ശതമാനം ഉയർന്നപ്പോൾ, തിരഞ്ഞെടുത്ത പ്രധാനമന്ത്രിയെന്ന നിലയിൽ ട്രൂഡോയ്‌ക്കുള്ള പിന്തുണ 2.4 ശതമാനം പോയിന്‍റ് ഉയർന്നു. നാലാഴ്ച മുമ്പ് വോട്ടെടുപ്പ് നടക്കുമ്പോൾ കാൻഡിസ് ബെർഗൻ ഇടക്കാല കൺസർവേറ്റീവ് നേതാവായിരുന്നുവെന്ന് നാനോസ് കുറിക്കുന്നു.

സർവേയിൽ പങ്കെടുത്തവരിൽ 14.9 ശതമാനം പേർ ജഗ്മീത് സിങ്ങിനെ പ്രധാനമന്ത്രിയായി തിരഞ്ഞെടുക്കണമെന്ന പക്ഷക്കാരായിരുന്നു. നാലാഴ്ച മുമ്പത്തെ അപേക്ഷിച്ച് ഈ കൂട്ടത്തിലുൾപ്പെടുന്നവരുടെ എണ്ണം 6.0 ശതമാനം കുറഞ്ഞു. ഇതിൽ കൌതുകരവും രസകരവുമായ മറ്റൊരു വിഭാഗം ആളുകളുണ്ട്. 14 ശതമാനം വരുന്ന ഇവർ പറഞ്ഞത് നേതാക്കളിൽ ആരെയും ഇഷ്ടപ്പെടുന്നില്ലെന്നായിരുന്നു. ഫോണിലൂടെ സർവേയിൽ പങ്കെടുത്ത 1,067 പ്രതികരണക്കാരും ഇക്കൂട്ടത്തിലുണ്ട്. പൊലിവറെക്കുറിച്ച് ചോദിക്കുമ്പോൾ പറയാൻ പോസിറ്റീവായി ഒന്നുമില്ലെന്ന് ആണ് അഞ്ചിൽ രണ്ട് പേരും അഭിപ്രായപ്പെട്ടത്. ട്രൂഡോയെക്കുറിച്ച് ഒരു പോസിറ്റീവ് കാര്യം പോലും പറയാൻ കഴിയില്ലെന്ന് പറഞ്ഞവർ 31 ശതമാനം ഉണ്ട്.

ജനസംഖ്യയുടെ ഒരു പ്രധാന ഭാഗം ആളുകളും ഇതിലൊന്നിനെക്കുറിച്ചും ഇഷ്ടപ്പെടുന്നില്ല, മാത്രമല്ല തിരഞ്ഞെടുപ്പുകളിൽ അവർ സന്തുഷ്ടരുമല്ല. എന്നിരുന്നാലും, 12.4 ശതമാനം പേർ നിലവിലെ പ്രധാനമന്ത്രി കൊവിഡ് കൈകാര്യം ചെയ്യുന്നതിൽ മികച്ച പ്രകടനം കാഴ്ചവച്ചതായി അഭിപ്രായപ്പെട്ടു. 11.9 ശതമാനം പേർ ആരോഗ്യ സംരക്ഷണം, തദ്ദേശീയ പ്രശ്നങ്ങൾ, കഞ്ചാവ് നിയമവിധേയമാക്കൽ എന്നിവയുൾപ്പെടെയുള്ള സാമൂഹിക കാര്യങ്ങളിൽ അദ്ദേഹത്തിന്റെ നയങ്ങൾ ഇഷ്ടപ്പെട്ടുവെന്ന് പറഞ്ഞു. പൊലിവറെയെ സംബന്ധിച്ചിടത്തോളം, 5.7 ശതമാനം പേർ അദ്ദേഹം കനേഡിയൻമാരെക്കുറിച്ച് കരുതുന്നുണ്ടെന്നും 5.6 ശതമാനം പേർ അദ്ദേഹം ഒരു നല്ല പ്രഭാഷകനാണെന്നും അഭിപ്രായപ്പെട്ടു.

ട്രൂഡോയെക്കുറിച്ച് മോശമായ കാര്യങ്ങൾ പറയാൻ ആവശ്യപ്പെട്ടപ്പോൾ, 16.4 ശതമാനം പേർ പറഞ്ഞത് അദ്ദേഹത്തിന്‍റെ സർക്കാർ വളരെയധികം പണം ചെലവഴിക്കുകയാണെന്നാണ്. പ്രതികരിച്ച മറ്റുള്ളവർ ബ്ലാക്ക്ഫേസ്, ഡബ്ല്യുഇ ചാരിറ്റി, എസ്എൻസി ലാവലിൻ എന്നിവയുമായി ബന്ധപ്പെട്ട മുൻ അഴിമതികൾ ചൂണ്ടിക്കാട്ടി. പൊലിവറെയുടെ ചീത്ത വശങ്ങളായി പലരും ഉയർത്തിക്കാട്ടിയത് അദ്ദേഹം ഉപയോഗിക്കുന്ന നിശിതമായ ഭാഷയും ചില വാക്കുകളുമാണ്.