ബ്രിട്ടീഷ് കൊളംബിയയിലെ ചില്ലിവാക്കിൽ ചെറു വിമാനം തകർന്ന് മൂന്ന് പേർ മരിച്ചു. ചില്ലിവാക്ക് മുനിസിപ്പൽ എയർപോർട്ടിൽ നിന്ന് ഒരു കിലോമീറ്റർ അകലെയുള്ള ചില്ലിവാക്ക് മോട്ടോർ ഇന്നിന് സമീപമുള്ള വനപ്രദേശത്താണ് വിമാനം തകർന്നത്. ലാംഗ്ലി റീജിയണൽ എയർപോർട്ടിൽ നിന്ന് പ്രവർത്തിക്കുന്ന ഫ്ലൈറ്റ് സ്കൂളായ സ്കൈക്വസ്റ്റ് ഏവിയേഷൻ ലിമിറ്റഡ് എന്ന കമ്പനിയിലാണ് വിമാനം രജിസ്റ്റർ ചെയ്തിരിക്കുന്നത്.
കനേഡിയൻ സിവിൽ എയർക്രാഫ്റ്റ് രജിസ്റ്റർ പ്രകാരം വിമാനം പൈപ്പർ പിഎ 34 ആണ്. 1972 ൽ നിർമ്മിച്ച വിമാനമാണിത്. മരിച്ചവരുടെ പേരുവിവരങ്ങൾ പുറത്തുവിട്ടിട്ടില്ല. മറ്റ് പരിക്കുകളൊന്നും റിപ്പോർട്ട് ചെയ്തിട്ടില്ലെന്നും സംഭവസ്ഥലത്ത് പൊതുജനങ്ങൾക്ക് അപകടങ്ങളൊന്നും ഉണ്ടായിട്ടില്ലെന്നും ബ്രിട്ടീഷ് കൊളംബിയ ആർസിഎംപി പറഞ്ഞു. അപകടകാരണം വ്യക്തമല്ല. വിവരങ്ങൾ ശേഖരിക്കാനും എന്താണ് സംഭവിച്ചതെന്ന് വിലയിരുത്താനും അന്വേഷണ സംഘത്തെ അയച്ചിട്ടുണ്ടെന്ന് ഗതാഗത സുരക്ഷാ ബോർഡ് അറിയിച്ചു.
