വിക്ടോറിയ : നഗരത്തിലും സമീപ പ്രദേശങ്ങളിലും വാഹനമോഷണം പെരുകുന്നതായി വിക്ടോറിയ പൊലീസ് റിപ്പോർട്ട് ചെയ്തു. ജനുവരി 1-നും ഫെബ്രുവരി 25-നും ഇടയിൽ നഗരത്തിൽ 22 വാഹനങ്ങൾ മോഷ്ടിക്കപ്പെട്ടതായി വെസ്റ്റ് ഷോർ ആർസിഎംപി അറിയിച്ചു. കഴിഞ്ഞ വർഷം ഇതേ കാലയളവിനെക്കാൾ ഏകദേശം മൂന്നിരട്ടി കൂടുതലാണിത്.
ഈ വർഷം മോഷണം പോയ 22 വാഹനങ്ങളിൽ ഒമ്പതും പിക്കപ്പ് ട്രക്കുകളാണെന്ന് പൊലീസ് പറയുന്നു. വാഹന ഉടമകൾ ഒരിക്കലും കാറിൻ്റെ താക്കോൽ ശ്രദ്ധിക്കാതെ വാഹനത്തിനുള്ളിൽ വെക്കരുത്. കൂടാതെ വാഹനത്തിനുള്ളിൽ സ്പെയർ കീ വയ്ക്കരുതെന്നും അധികൃതർ നിർദ്ദേശിച്ചു. 2007-ന് മുമ്പ് നിർമ്മിച്ച വാഹനങ്ങളുടെ ഉടമകൾ മോഷണം തടയുന്നതിന് സ്റ്റിയറിംഗ് വീൽ ലോക്ക് അല്ലെങ്കിൽ ഇലക്ട്രോണിക് എഞ്ചിൻ ഇമ്മൊബിലൈസർ പോലുള്ള ഉപകരണങ്ങൾ ഉപയോഗിക്കുന്നത് പരിഗണിക്കണമെന്ന് അന്വേഷണ ഉദ്യോഗസ്ഥർ പറയുന്നു. നല്ല വെളിച്ചമുള്ള സ്ഥലങ്ങളിലോ സുരക്ഷിതമായ ഗാരേജുകളിലോ വാഹനം പാർക്ക് ചെയ്യാനും വാഹനത്തിൽ വിലപിടിപ്പുള്ള സാധനങ്ങൾ സൂക്ഷിക്കരുതെന്നും ഉദ്യോഗസ്ഥർ നിർദ്ദേശിച്ചു.
