ഓട്ടവ : ആരോഗ്യ പ്രവർത്തകരെ ഭീതിയിലാഴ്ത്തി വാക്സിനിലൂടെ പ്രതിരോധിക്കാവുന്ന രോഗമായ അഞ്ചാംപനി കാനഡയിലുടനീളം പടർന്നു പിടിക്കുന്നു. രാജ്യത്തുടനീളം പുതിയ കേസുകൾ പ്രത്യക്ഷപ്പെടുമ്പോൾ ഒൻ്റാരിയോയിൽ അണുബാധിതരുടെ എണ്ണം ദിനപ്രതി വർധിക്കുന്നു. മാർച്ച് 18 വരെ, കാനഡയിലുടനീളം ഈ വർഷത്തിൻ്റെ ആരംഭം മുതൽ 369 കേസുകൾ റിപ്പോർട്ട് ചെയ്തതായി പബ്ലിക് ഹെൽത്ത് ഏജൻസി ഓഫ് കാനഡയുടെ (PHAC) ഏറ്റവും പുതിയ ഡാറ്റ സൂചിപ്പിക്കുന്നു. ബ്രിട്ടിഷ് കൊളംബിയ, ആൽബർട്ട, സസ്കാച്വാൻ, മാനിറ്റോബ, ഒൻ്റാരിയോ, കെബെക്ക് എന്നീ പ്രവിശ്യകളിൽ ഇപ്പോൾ അഞ്ചാംപനി സ്ഥിരീകരിച്ചിട്ടുണ്ട്.
കൃത്യമായ കണക്കുകൾ മാറിക്കൊണ്ടിരിക്കുമ്പോൾ, പ്രതിരോധ കുത്തിവയ്പ് എടുക്കാത്തവരിൽ നിന്നാണ് ഇപ്പോഴത്തെ അഞ്ചാംപനി വ്യാപനം ഉണ്ടായിരിക്കുന്നതെന്ന് ആരോഗ്യ ഉദ്യോഗസ്ഥർ പറയുന്നു. കൂടാതെ കാനഡയിലുടനീളം റിപ്പോർട്ട് ചെയ്ത അഞ്ചാംപനി കേസുകളിൽ ഏകദേശം 80 ശതമാനവും വാക്സിൻ സ്വീകരിക്കാത്ത വ്യക്തികളിലാണ്.
വിദേശയാത്രയുമായി ബന്ധപ്പെട്ട് 2024 ഒക്ടോബറിൽ ന്യൂബ്രൺസ്വിക്കിലും തുടർന്ന് ഒൻ്റാരിയോയിലും അണുബാധ റിപ്പോർട്ട് ചെയ്തതോടെയാണ് കാനഡയിൽ അഞ്ചാംപനി പൊട്ടിപ്പുറപ്പെട്ടത്. എന്നാൽ ഒൻ്റാരിയോയിലും കാനഡയിലെ മറ്റു പ്രവിശ്യകളിലും വൈറസ് ഇപ്പോഴും പടരുകയാണ്. സ്പ്രിങ് ബ്രേക്കിൽ ഉയർന്ന അഞ്ചാംപനി നിരക്കുള്ള, പ്രത്യേകിച്ച് തെക്കൻ യുണൈറ്റഡ് സ്റ്റേറ്റ്സിലേക്കുള്ള യാത്ര വരും ആഴ്ചകളിൽ കാനഡയിൽ കൂടുതൽ വ്യാപനത്തിന് കാരണമാകുമെന്ന് ആരോഗ്യ വിദഗ്ധർ ആശങ്കപ്പെടുന്നു.
ന്യൂബ്രൺസ്വിക്കിൽ റിപ്പോർട്ട് ചെയ്ത തൊണ്ണൂറ് ശതമാനം കേസുകളും വാക്സിൻ എടുക്കാത്തവരിലാണെന്ന് പ്രവിശ്യാ ആരോഗ്യ അതോറിറ്റി അറിയിച്ചു. പ്രവിശ്യയിലെ ഒരു പരിപാടിയിൽ പങ്കെടുത്ത ആളുകൾ പിന്നീട് ഒൻ്റാരിയോയിലേക്കും തിരിച്ചും യാത്ര ചെയ്തതോടെ ഇരു പ്രവിശ്യകളിലും അണുബാധിതരുടെ എണ്ണം കുതിച്ചുയരാൻ കാരണമായി. പിന്നീട് ഒൻ്റാരിയോയിൽ നിന്ന് ആൽബർട്ടയിലേക്കും ആൽബർട്ടയിൽ നിന്ന് ഒൻ്റാരിയോയിലേക്കും വ്യക്തികൾ യാത്ര ചെയ്തതോടെ അഞ്ചാംപനി കേസുകൾ കുതിച്ചുയർന്നു. അതേസമയം ഒൻ്റാരിയോയിൽ മാർച്ച് അവധിക്ക് ശേഷം, വരും ദിവസങ്ങളിൽ കൂടുതൽ കേസുകൾ റിപ്പോർട്ട് ചെയ്‌തേക്കുമെന്ന് പബ്ലിക് ഹെൽത്ത് ഒൻ്റാരിയോയിലെ പബ്ലിക് ഹെൽത്ത് ഫിസിഷ്യനായ ക്രിസ്റ്റീൻ നവാരോ മുന്നറിയിപ്പ് നൽകുന്നു.
അഞ്ചാംപനി വാക്സിൻ കാനഡയിൽ മീസിൽസ്-മംപ്സ്-റൂബെല്ല (എംഎംആർ) അല്ലെങ്കിൽ മീസിൽസ്-മംപ്സ്-റൂബെല്ല-വാരിസെല്ല (എംഎംആർവി) വാക്സിൻ ആയി ലഭ്യമാണ്. 12-ഓ 15-ഓ മാസം പ്രായമാകുമ്പോൾ ഒരു ഡോസ് നൽകിയാൽ ഇത് 85 മുതൽ 95% വരെ ഫലപ്രദമാകുമെന്ന് കണക്കാക്കപ്പെടുന്നു. രണ്ടാമത്തെ ഡോസ് സ്വീകരിക്കുന്നതിലൂടെ ഫലപ്രാപ്തി ഏകദേശം 100 ശതമാനമായി ഉയരുന്നു, PHAC പറയുന്നു.
ചെറിയ കുട്ടികളിലും രോഗപ്രതിരോധശേഷി കുറഞ്ഞവരിലും അഞ്ചാംപനി ഗുരുതരമായ ആരോഗ്യപ്രശ്നങ്ങൾക്ക് ഇടയാക്കും. രോഗബാധിതനായ ഒരാൾ ശ്വസിക്കുമ്പോഴോ ചുമയ്ക്കുമ്പോഴോ തുമ്മുമ്പോഴോ വായുവിലൂടെയാണ് അഞ്ചാംപനി പടരുന്നത്. പനി, ചുമ, മൂക്കൊലിപ്പ്, കണ്ണുകൾക്ക് ചുവന്ന നിറം, തുടങ്ങിയവയാണ് അഞ്ചാംപനിയുടെ പ്രാഥമിക ലക്ഷണങ്ങൾ. ഈ ലക്ഷണങ്ങൾക്ക് ശേഷം ചുണങ്ങു പ്രത്യക്ഷപ്പെടുന്നു. ഇത് ആദ്യം മുഖത്തും കഴുത്തിലും ആരംഭിച്ച് നെഞ്ചിലേക്കും കൈകളിലേക്കും കാലുകളിലേക്കും വ്യാപിക്കും. ചുണങ്ങു ഏകദേശം നാല് മുതൽ ഏഴ് ദിവസം വരെ നീണ്ടുനിൽക്കും. വായ്ക്കുള്ളിൽ ചെറിയ വെളുത്ത പാടുകളും ഉണ്ടാകാം. അഞ്ചാംപനി വൈറസ് ബാധിച്ച് ഏഴ് ദിവസത്തിന് ശേഷം രോഗലക്ഷണങ്ങൾ ആരംഭിക്കുമെന്ന് ആരോഗ്യ ഉദ്യോഗസ്ഥർ പറയുന്നു.
