വിനിപെഗ് : പ്രവിശ്യയിലെ ഉയർന്ന അപകടസാധ്യതയുള്ളവർക്കായി മെയ് ഒന്ന് മുതൽ കോവിഡ് വാക്‌സിനേഷൻ കാമ്പെയ്ൻ ആരംഭിക്കുമെന്ന് മാനിറ്റോബ സർക്കാർ അറിയിച്ചു. കോവിഡ് വൈറസ് സങ്കീർണത സൃഷ്ടിക്കാൻ സാധ്യതയുള്ള വ്യക്തികൾക്ക് കാമ്പെയ്നിൽ മുൻഗണന നൽകും. പ്രായമുള്ളവർ, രോഗപ്രതിരോധ ശേഷി കുറഞ്ഞവർ, വിട്ടുമാറാത്ത രോഗങ്ങളുള്ളവർ എന്നിവരുൾപ്പെടെ ദുർബലരായ ജനങ്ങളെ സംരക്ഷിക്കുക എന്നതാണ് കാമ്പെയ്നിലൂടെ ലക്ഷ്യമിടുന്നത്.
ലോങ് ടേം കെയർ ഹോമുകളിലെയും മറ്റ് വയോജന കേന്ദ്രങ്ങളിലെയും താമസക്കാർ, 75 വയസ്സിനു മുകളിലുള്ളവർ, രോഗപ്രതിരോധ ശേഷി കുറഞ്ഞവരോ ഡയാലിസിസിന് വിധേയരായവരോ, വിട്ടുമാറാത്ത രോഗങ്ങളുള്ളവരോ വിദൂര പ്രദേശങ്ങളിൽ താമസിക്കുന്നവരോ ആയ 65-നും 74-നും ഇടയിൽ പ്രായമുള്ളവർ എന്നിവർ ഒരു ഡോസ് വാക്സിൻ എടുക്കാനാണ് സർക്കാർ ശുപാർശ ചെയ്യുന്നത്. ഇതിനകം കോവിഡ് വാക്സിൻ സ്വീകരിച്ചവർ മറ്റൊരു ഡോസ് സ്വീകരിക്കുന്നതിന് മുമ്പ് ആറ് മാസം കാത്തിരിക്കണം.
മെഡിക്കൽ ക്ലിനിക്കുകൾ, ഫാർമസികൾ, നഴ്സിംഗ് സ്റ്റേഷനുകൾ, ഗ്രാമീണ പൊതുജനാരോഗ്യ ഓഫീസുകൾ എന്നിവിടങ്ങളിൽ വാക്സിനുകൾ സൗജന്യമായി ലഭിക്കും. പ്രവിശ്യയുടെ വെബ്‌സൈറ്റിൽ പ്രസിദ്ധീകരിച്ച മാപ്പിൽ മാനിറ്റോബ നിവാസികൾക്ക് സൗകര്യപ്രദമായ ഒരു സ്ഥലം കണ്ടെത്താനാകും. അതേസമയം ജൂലൈ 1 മുതൽ കോവിഡ് വാക്സിനുകൾ താൽക്കാലികമായി പ്രത്യേക സാഹചര്യങ്ങളിൽ മാത്രമേ ലഭ്യമാകൂ. 2025-ലെ പ്രതിരോധ കുത്തിവയ്പ്പ് കാമ്പെയ്ൻ ആരംഭിക്കുന്നതിന് മുമ്പ് മൂന്ന് മാസത്തെ സമയം അനുവദിക്കും.
