റെജൈന : സാൽമൊണെല്ല മലിനീകരണ സാധ്യതയെ തുടർന്ന് പ്രെയ്റി പ്രവിശ്യകളിൽ വിറ്റ കോക്കനട്ട് മീറ്റ് തിരിച്ചുവിളിച്ചതായി കനേഡിയൻ ഫുഡ് ഇൻസ്പെക്ഷൻ ഏജൻസി (CFIA) അറിയിച്ചു. ആൽബർട്ട, ബ്രിട്ടിഷ് കൊളംബിയ, സസ്കാച്വാൻ എന്നീ പ്രവിശ്യകളിൽ വിറ്റഴിച്ച ക്യാപ്റ്റൻസ് ചോയ്സ് കോക്കനട്ട് മീറ്റ് (400 ഗ്രാം) ആണ് ബാധിത ഉൽപ്പന്നം.
ഉൽപ്പന്നവുമായി ബന്ധപ്പെട്ട് ഇതുവരെ ആരും രോഗബാധിതരായതായി റിപ്പോർട്ട് ലഭിച്ചിട്ടില്ലെന്ന് ഏജൻസി അറിയിച്ചു. തിരിച്ചുവിളിച്ച ഉൽപ്പന്നം കഴിക്കുകയോ ഉപയോഗിക്കുകയോ ചെയ്യരുതെന്ന് CFIA നിർദ്ദേശിച്ചു. സാൽമൊണെല്ല കലർന്ന ഭക്ഷണം കേടായതായി അനുഭവപ്പെടുകയോ ചീത്ത മണം ഉണ്ടാവുകയോ ഇല്ല. എന്നാൽ, കൊച്ചുകുട്ടികൾ, ഗർഭിണികൾ, പ്രായമായവർ, രോഗപ്രതിരോധശേഷി കുറഞ്ഞവർ എന്നിവർക്ക് ഗുരുതരവും ചിലപ്പോൾ മാരകവുമായ അണുബാധകൾക്ക് കാരണമാകുമെന്ന് ഏജൻസി മുന്നറിയിപ്പ് നൽകി. കൂടാതെ മറ്റ് വ്യക്തികളിൽ പനി, തലവേദന, ഛർദ്ദി, ഓക്കാനം, വയറുവേദന, വയറിളക്കം എന്നിവയ്ക്കും ഇത് കാരണമാകും. സാൽമൊണെല്ല കലർന്ന ഭക്ഷണം കഴിക്കുന്നത് ചില വ്യക്തികളിൽ ഗുരുതരമായ ആർത്രൈറ്റിസിനും കാരണമാകും.
