ഓട്ടവ : ഇറാൻ-ഇസ്രയേൽ സംഘർഷം കാരണം കാനഡയിലുടനീളം പെട്രോൾ-ഡീസൽ വില കുതിച്ചുയരുന്നു. വടക്കൻ ഒൻ്റാരിയോയിൽ ലിറ്ററിന് 18 സെൻ്റ് വർധന രേഖപ്പെടുത്തിയപ്പോൾ നോവസ്കോഷയിൽ ഡീസൽ വില ഏഴ് ദിവസത്തിനുള്ളിൽ വീണ്ടും ലിറ്ററിന് 16 സെൻ്റ് വർധിച്ചു. ഇറാൻ-ഇസ്രയേൽ സംഘർഷം വിപണി അസ്ഥിരതയ്ക്ക് കാരണമാകുന്നു. ഇത് എണ്ണയുടെ വിതരണത്തെയും ആവശ്യകതയെയും ബാധിക്കുന്നതായി പെട്രോളിയം അനലിസ്റ്റ് പാട്രിക് ഡി ഹാൻ പറയുന്നു. ഇന്ധനവില കുറയ്ക്കാൻ നടപടി സ്വീകരിച്ചില്ലെങ്കിൽ ഈ പ്രവണത തുടരുമെന്നും അദ്ദേഹം മുന്നറിയിപ്പ് നൽകി.
അതേസമയം ഡീസൽ വില വർധന ദീർഘദൂര ട്രക്കിങ് കമ്പനികൾക്ക് കടുത്ത സാമ്പത്തിക ആഘാതമാണ് സൃഷ്ടിക്കുന്നത്. ആഴ്ചയിൽ ഒന്നിലധികം തവണ ഡീസൽ നിറയ്ക്കുന്ന ട്രക്കുകൾക്ക് ഇന്ധനച്ചെലവിലെ ഈ വർധന സൃഷ്ടിക്കുന്ന പ്രത്യാഘാതങ്ങൾ ചെറുതല്ലെന്ന് കനേഡിയൻ ട്രക്കിങ് അസോസിയേഷൻ കമ്മ്യൂണിക്കേഷൻസ് ഡയറക്ടർ മാർക്കോ ബെഗെറ്റോ പറയുന്നു.
