ടൊറൻ്റോ : ടൊറൻ്റോയിലും നഗരത്തിന്‍റെ വടക്കൻ മേഖലയിലെ നിരവധി പ്രദേശങ്ങളിലും ശക്തമായ ഇടിമിന്നലിനു സാധ്യതയുണ്ടെന്ന് എൻവയൺമെൻ്റ് കാനഡയുടെ മുന്നറിയിപ്പ്. ഞായറാഴ്ച വൈകുന്നേരം വരെ അപകടകരമായ ഇടിമിന്നൽ ഉണ്ടാകുന്നതിന് അനുകൂലമായ സാഹചര്യങ്ങളാണ് നിലവിലുള്ളതെന്ന് കാലാവസ്ഥാ ഏജൻസി പ്രവചിക്കുന്നു. വോൺ, റിച്ച്മണ്ട് ഹിൽ, മാർക്കം എന്നിവിടങ്ങളിൽ മുന്നറിയിപ്പ് ബാധകമായിരിക്കും.
ചില പ്രദേശങ്ങളിൽ മഴയും ഇടിമിന്നലും ആലിപ്പഴം വീഴ്ചയ്ക്കും ശക്തമായ കാറ്റിനും സാധ്യതയുണ്ടെന്ന് ദേശീയ കാലാവസ്ഥാ വകുപ്പ് പറയുന്നു. കനത്ത മഴ പെട്ടെന്നുള്ള വെള്ളപ്പൊക്കത്തിനും ദൃശ്യപരത കുറയുന്നതിനും കാരണമാകും. വെള്ളം കെട്ടിനിൽക്കുന്ന റോഡുകളിലൂടെ വാഹനമോടിക്കരുതെന്നും എൻവയൺമെൻ്റ് കാനഡ നിർദ്ദേശിച്ചു.
അതേസമയം ടൊറൻ്റോയിലും തെക്കൻ ഒൻ്റാരിയോയിലും നിലവിൽ ഉഷ്ണതരംഗ മുന്നറിയിപ്പ് തുടരുകയാണ്. ഈ മേഖലയിൽ പരമാവധി 29-നും 32-നും ഇടയിൽ താപനില ഉയരുമെന്ന് കാലാവസ്ഥാ ഏജൻസി പ്രവചിക്കുന്നു. എന്നാൽ, ഈർപ്പത്തിനൊപ്പം ചൂട് 40 ഡിഗ്രി സെൽഷ്യസ് ആയി അനുഭവപ്പെടും.
