ഓട്ടവ : 2025-2026 ആനുകൂല്യ വർഷത്തേക്കുള്ള കാനഡ ചൈൽഡ് ബെനിഫിറ്റ് (CCB) വർധിപ്പിച്ച തുകയോടെ ജൂലൈ 18-ന് യോഗ്യരായ കനേഡിയൻ പൗരന്മാരുടെ അക്കൗണ്ടുകളിലേക്ക് എത്തും. 2025-2026 ആനുകൂല്യ വർഷത്തേക്ക് (ജൂലൈ 2025 മുതൽ ജൂൺ 2026 വരെ), സ്റ്റാറ്റിസ്റ്റിക്സ് കാനഡയിൽ നിന്നുള്ള ഉപഭോക്തൃ വില സൂചിക (സിപിഐ)യെ അടിസ്ഥാനമാക്കി, കാനഡ ചൈൽഡ് ബെനിഫിറ്റ് തുക 2.7% വർധിക്കും. 18 വയസ്സിന് താഴെയുള്ള കുട്ടികളെ വളർത്തുന്നതിനുള്ള, അർഹരായ കുടുംബങ്ങൾക്ക് നൽകുന്ന നികുതി രഹിത പ്രതിമാസ പേയ്‌മെൻ്റാണ് കാനഡ ചൈൽഡ് ബെനിഫിറ്റ്. അപേക്ഷകരുടെ വരുമാനവും കുട്ടികളുടെ പ്രായവും അനുസരിച്ചായിരിക്കും തുക അനുവദിക്കുക. ഓഗസ്റ്റ് 20, സെപ്റ്റംബർ 19, ഒക്ടോബർ 20, നവംബർ 20, ഡിസംബർ 12 എന്നിവയാണ് വരാനിരിക്കുന്ന 2025-ലെ CCB പേയ്‌മെൻ്റ് തീയതികൾ.
ആറ് വയസ്സിന് താഴെയുള്ള കുട്ടികൾക്കുള്ള പരമാവധി വാർഷിക ആനുകൂല്യം ഇപ്പോൾ ഒരു കുട്ടിക്ക് 7,997 ഡോളർ ലഭിക്കും. അല്ലെങ്കിൽ പ്രതിമാസം ഏകദേശം 666.41 ഡോളറായിരിക്കും ലഭിക്കുക. അതേസമയം ആറ് മുതൽ 17 വയസ്സ് വരെ പ്രായമുള്ള കുട്ടികൾക്ക് പരമാവധി ആനുകൂല്യം ഒരു കുട്ടിക്ക് ലഭിക്കുന്നത് 6,748 ഡോളർ ആയിരിക്കും. അല്ലെങ്കിൽ പ്രതിമാസം ഏകദേശം 562.33 ഡോളർ.
കുറഞ്ഞ വരുമാനമുള്ള കുടുംബങ്ങൾക്ക് കൂടുതൽ തുക അനുവദിച്ചുകൊണ്ട്, ശക്തമായ പിന്തുണ നൽകുന്നതിനാണ് സിസിബി രൂപകൽപ്പന ചെയ്തിരിക്കുന്നത്. കുട്ടിയുടെ പ്രായം, രക്ഷിതാവിൻ്റെ റസിഡൻസി സ്റ്റാറ്റസ്, കുടുംബത്തിൻ്റെ വരുമാനം എന്നിവ ഉൾപ്പെടെ നിരവധി ഘടകങ്ങളെ അടിസ്ഥാനമാക്കിയാണ് സിസിബിയുടെ യോഗ്യത നിർണ്ണയിക്കുന്നത്. 18 വയസ്സിന് താഴെയുള്ള കുട്ടികൾക്ക് കാനഡ ചൈൽഡ് ബെനിഫിറ്റ് ലഭിക്കും. കുട്ടിക്ക് 18 വയസ്സ് തികയുന്ന മാസം വരെ പേയ്‌മെൻ്റുകൾ ലഭിക്കുന്നത് തുടരും.
