ഓട്ടവ : മെയ് മാസത്തെ അപേക്ഷിച്ച് ജൂണിൽ ഭവന നിർമ്മാണ വാർഷിക നിരക്ക് 0.4% വർധിച്ചതായി കാനഡ മോർഗെജ് ആൻഡ് ഹൗസിങ് കോർപ്പറേഷൻ (CMHC) റിപ്പോർട്ട്. മെയ് മാസത്തിൽ 282,705 വീടുകളാണ് നിർമ്മിച്ചതെങ്കിൽ ജൂണിൽ അത് 283,734 യൂണിറ്റുകളായി വർധിച്ചതായി ദേശീയ ഭവന ഏജൻസി പറയുന്നു.
10,000 അല്ലെങ്കിൽ അതിൽ കൂടുതൽ ജനസംഖ്യയുള്ള നഗരങ്ങളിലെ വാർഷിക ഭവന നിർമ്മാണ നിരക്ക് മെയ് മാസത്തിലെ 260,947 യൂണിറ്റുകളിൽ നിന്ന് ജൂണിൽ 261,705 യൂണിറ്റുകളായി വർധിച്ചതായും ഏജൻസി റിപ്പോർട്ട് ചെയ്തു. അതേസമയം ഗ്രാമീണ മേഖലയിലെ വാർഷിക ഭവന നിർമ്മാണ നിരക്ക് 22,029 യൂണിറ്റുകളായി. കൂടാതെ 10,000 അല്ലെങ്കിൽ അതിൽ കൂടുതൽ ജനസംഖ്യയുള്ള കേന്ദ്രങ്ങളിൽ യഥാർത്ഥ ഭവന നിർമ്മാണം ജൂണിൽ 23,282 യൂണിറ്റുകളായി ഉയർന്നു. കഴിഞ്ഞ വർഷം ജൂണിൽ ഇത് 20,509 ആയിരുന്നു.
